जयललितांच्या भूमिकेतील कंगनाचा लूक पाहाच...

मुंबई : तमिळनाडूच्या माजी मुख्यमंत्री जयललिता यांच्या जीवनावर आधारित चित्रपट येत असून, यामध्ये अभिनेत्री कंगना राणावत त्यांची भूमिका साकारणार आहे. कंगनाचा जयललितांच्या भूमिकेतील लूक सोशल मीडियावर व्हायरल झाला आहे.

कंगना राणावतची बहिण रंगोली चंडेल हिने आपल्या ट्विटरवर अकाउंटवरून कंगना आणि जयललिता यांचा फोटो प्रसिद्ध केला आहे. जयललिता यांच्या कारकिर्दीवर आधारित या चित्रपटाचे नाव 'थलैवी' असे असणार आहे. या फोटोमध्ये कंगना पांढऱ्या साडीमध्ये दिसत असून, जयललिता यांच्याप्रमाणे लाल रंगाची टिकली लावलेली आहे. कंगनाच्या यापूर्वीच्या लूकवर खूप टीका झाली होती.

केव्ही विजयेंद्र यांनी या चित्रपटाचे कथालेखन केले असून, एएल विजय या चित्रपटाचे दिग्दर्शक आहेत. जयललिता यांच्या भूमिकेत कंगना आणि एमजीआर यांच्या भूमिकेत अरविंद स्वामी दिसणार आहे. तर, जिशू सेनगुप्ता ही शोभन बाबू, मधू ही जानकी रामचंद्रन आणि पूर्णा ही शशिकला नटराजन यांच्या भूमिकेत असेल.