Swapnil Mayekar passed away: लेखक - दिग्दर्शक स्वप्नील मयेकर यांचं निधन, सिनेमाच्या रिलीजपूर्वी झाली एक्झीट

मराठी पाऊल पडते पुढे ह्या उद्या प्रदर्शित होणाऱ्या चित्रपटाचे लेखक-दिग्दर्शक स्वप्नील मयेकर यांचे दुःखद निधन झाले आहे.

आज पहाटे चेंबूर घाटलागाव येथे राहत्या घरी निधन झाले आहे. गेले काही महिने ते आजारी होते. हा त्यांचा स्वतंत्र लेखक दिग्दर्शक म्हणून पहिलाच सिनेमा होता. वयाच्या 46 व्या वर्षी स्वप्नील मयेकर यांनी अखेरचा श्वास घेतला.

स्वप्नील मयेकर यांच्या पश्चात पत्नी आणि दोन मुली असे त्यांचे कुटुंब आहे. ‘हा खेळ संचितांचा’ या मालिकेसाठी स्वप्निल यांनी सहाय्यक दिग्दर्शक म्हणून काम केल होतं. स्वप्नील मयेकर यांच्या निधनानं आता मराठी चित्रपटसृष्टीवर शोककळा पसरली आहे.

5 मे रोजी म्हणजेच उद्या स्वप्नील मयेकर यांचा मराठी पाऊल पडते पुढे हा चित्रपट रिलीज होणार आहे. मात्र, हा चित्रपट रिलीज होण्यापूर्वीच स्वप्नील मयेकर यांचे निधन झाल्याने या चित्रपटाच्या टीमवर दु:खाचा डोंगर कोसळला आहे.

मराठी पाऊल पडते पुढे या चित्रपटाचं अभिनेता चिराग पाटील आणि अभिनेत्री सिद्धी पाटणे, जेष्ठ अभिनेते अनंत जोग, सतीश पुळेकर, अभिनेते सतीश सलागरे आणि संजय कुलकर्णी या कलाकारांनी काम केलं आहे. तसेच मराठी पाऊल पडते पुढे या चित्रपटाच्या शूटिंग दरम्यानचे स्वप्नील मयेकर यांनी त्यांचे काही फोटो सोशल मीडियावर शेअर केले होते.