Pakistani Film Controversy: पाकिस्तानी कलाकार आणि चित्रपटाबाबत मनसेचा आक्षेप का आणि कशासाठी?

मराठीच्या सन्मानाची गुढी घेऊन निघालेल्या (मनसे) महाराष्ट्र नवनिर्माण सेनेने आता हिंदुत्वाकडे आपला मोर्चा वळवला आहे. गेल्या काही दिवसात मनसे हिंदुत्वाबाबत चांगलीच आक्रमक झाली आहे. मग तो राम मंदिर भेटीचा मुद्दा असतो किंवा हनुमान चालीसा.. मनसेचा हा बदललेला चेहरा आपल्या कामांतूनही व्यक्त होत आहे. त्यामुळे हिंदुत्वाची कास धरलेल्या मनसेने आता पाकिस्तानी कलाकारांना चांगलेच धारेवर धरले आहे.

कलेला कसल्याही सीमा नसतात असं म्हणतात,त्यातही मनसे हा कलाप्रेमी पक्ष आहे. मग हा विरोध का आणि कशासाठी हा प्रश्न निर्माण होतो. तर गेल्या काही वर्षात भारत आणि पाकिस्तान यांच्यातील वातावरण काहीसे तणावपूर्ण राहिलेले आहे. भारतीय कलाकारांचा सन्मान पाकिस्तानात केला जात नाही. शिवाय त्यांचे कलाकार आपल्या देशात येऊन मोठे होतात, तरीही त्यांना भारतविषयी प्रेम दिसत नाही. शिवाय दोन देशांमध्ये संघर्षाची भावना असल्याने त्यांच्या कलाकारारांनी इथे येण्यास मनसेचा तीव्र विरोध आहे.

हेही वाचा : सीमावादात रक्त सांडायला मराठी माणूसच का?

केवळ आताच नाही तर याआधीही मनसेने पाकिस्तानी गायकांना, विनोदवीरांना इथे येण्यास मज्जाव घातला होता. पण सध्या मनसे अधिकच आक्रमक झालेली दिसते. काही दिवसांपूर्वीच मनसेने बॉलीवुडमध्ये पाकिस्तानी कलाकारांना आणण्याचा घाट जातला होता, त्यावेळी बॉलीवूडकरांनाही मनसेने इशारा दिला होता. मनसेचे चित्रपट सेनेचे अध्यक्ष अमेय खोपकर यांनी काही दिवसांपूर्वीच एक ट्विट केले होते. ज्यामध्ये ते म्हणाले होते, 'बॉलिवूडमधील काही निर्मात्यांना पुन्हा एकदा पाकिस्तानी कलाकारांचा पुळका आला आहे. असं कानावर येतंय, ही नीच प्रवृत्ती वेळोवेळी ठेचावी लागते. म्हणूनच पुन्हा एकदा आम्ही स्पष्ट शब्दात इशारा देतोय की फाटक मुंबईच काय हिंदुस्थानातील कोणत्याही भाषेतील कलाकृतीत पाकिस्तानी कलाकार दिसला तर त्याचे गंभीर परिणाम संबंधित निर्मात्यांना भोगावे लागतील’ असे त्यांनी म्हटले होते.

तर आता फवाद खान या पाकिस्तानी अभिनेत्याचा चित्रपट भारतात प्रदर्शित करण्याची तयारी सुरू होती. हा बेतही मनसेने हाणून पडला आहे. ''फवाद खानचा ‘द लीजंड ऑफ मौला जट्ट’ हा पाकिस्तानी चित्रपट भारतात प्रदर्शित करण्यासाठी हालचाली सुरु आहेत. चीड आणणारी गोष्ट म्हणजे भारतीय कंपनी चित्रपट प्रदर्शनासाठी पायघड्या घालतेय. राजसाहेबांनी दिलेल्या आदेशानुसार आम्ही हा चित्रपट राज्यासह देशभरात कुठेही प्रदर्शित होऊ देणार नाही.'' अशी भूमिका आता मनसेने घेतली आहे. तर यासाठी रस्त्यावर उतरून तीव्र आंदोलन करण्याचा इशाराही मनसेने दिला आहे.