Video : सचिन-सुप्रिया पिळगावकर जोडीचा धमाकेदार डान्स

प्रसिद्ध रिअॅलिटी शो 'सुपर डान्सर 4' च्या नुकत्याच एका एपिसोडमध्ये अभिनेते सचिन पिळगावकर Sachin Pilgaonkar आणि सुप्रिया पिळगावकर Supriya Pilgaonkar यांनी प्रमुख पाहुणे म्हणून हजेरी लावली होती. या स्पेशल एपिसोडमध्ये स्पर्धकांसोबत सचिन आणि सुप्रिया यांनी अक्षरश: धमाल केली. ‘चला जेजुरीला जाऊ’ या गाण्यावर सचिन-सुप्रिया या जोडीने धमाकेदार डान्स केला. पडद्यावर या जोडीला एकत्र नाचताना पाहणं चाहत्यांसाठी मोठी पर्वणीच असते. यावेळी शोचे परीक्षक मलायका आरोरा, अनुराग बासू आणि गीता कपूर यांनी सचिन आणि सुप्रिया यांच्या डान्सचे भरभरून कौतुक केले. (sachin and supriya pilgaonkar performed lavani in Super dancer show watch video)

'बाजीराव मस्तानी' चित्रपटातील 'पिंगा' या गाण्यावर या शोमधील स्पर्धक प्रतीती दास आणि कोरिओग्राफर श्वेता वारियरने 'लावणी' आणि 'भरतनाट्यम'चा फ्युजन डान्स सादर केला. त्यांच्या डान्सला पाहून सचिन आणि सुप्रियानेदेखील डान्स केला. 'सुपर डान्सर 4'च्या या स्पेशल एपिसोडमध्ये सचिन आणि सुप्रिया यांनी स्पर्धकांना डान्समधील बारकावे सांगितले तसेच ‘लावणी’ या शब्दाची उत्पत्ती कशी झाली याची माहिती दिली. याआधी देखील सचिन आणि सुप्रिया यांनी या शोमध्ये उपस्थिती लावली होती. यावेळी सचिन यांनी ‘या रावजी बसा भावजी’ या गाणायावर लावणी सादर केली होती.

सध्या महाराष्ट्रात लॉकडाउन असल्याने इतर मालिका आणि शोजप्रमाणे 'सुपर डान्सर 4'चेही शूटिंग राज्याबाहेर नव्या ठिकाणी होत आहे. या नव्या पर्वात परीक्षक शिल्पा शेट्टीची जागा मलायका अरोराने घेतली आहे.