'लग्नाची बेडी' मालिकेतून सायली देवधर येणार प्रेक्षकांच्या भेटीला

येत्या ३१ जानेवारीपासून दुपारी १ वाजता 'लग्नाची बेडी' (lagnachi bedi) ही नवीन मालिका स्टार प्रवाह वाहिनीवर प्रेक्षकांच्या भेटीला येणार आहे. अभिनेत्री सायली देवधर (Sayali Deodhar) या मालिकेत सिंधू सावंत ही व्यक्तिरेखा साकारणार आहे. या भूमिकेविषयी सांगताना सायली म्हणाली, "स्टार प्रवाह वाहिनीसोबत मी पुन्हा एकदा जोडली जातेय याचा आनंद आहे. याआधी स्टार प्रवाहच्या लेक माझी लाडकी या मालिकेतून मी प्रेक्षकांच्या भेटीला आले होते. त्यामुळे ही मालिका करताना माहेरी आल्याची भावना आहे."

सिंधू ही कोकणात वाढलेली मुलगी आहे. लहानशा गावात वाढूनही तिची शिकण्याची इच्छा प्रबळ आहे. तिचं डॉक्टर बनण्याचं स्वप्न आहे. डॉक्टर झाल्यानंतरही गावातल्या लोकांची सेवा करण्याची तिची इच्छा आहे. महत्त्वाकांक्षी आणि खंबीर असं हे पात्र आहे. कुठल्याही परिस्थितीत ठामपणे उभी रहाणारी आणि स्वत:ची मतं मांडणारी अशी ही सिंधू आहे. सिंधूचं तिच्या वडिलांवर खूप प्रेम आहे. त्यांची ती मनापासून सेवा करते. मात्र नियतीच्या मनात दुसरंच काहीतरी आहे. वडिलांवर जीवापाड प्रेम करणाऱ्या सिंधूला तिच्या वडिलांना गमवावं लागतं. यामागे नेमकं कोणतं कारण आहे हे मालिकेतून उलगडेल.

सायली देवधर हा मराठी मालिकाविश्वातील लोकप्रिय चेहरा आहे. 'लेक माझी लाडकी', 'जुळून येती रेशीमगाठी' यांसारख्या मालिकांमध्ये तिने काम केलं आहे.