'सूर नवा ध्यास नवा' फेम हर्षद नायबळ आता झळकणार मालिकेत

आपल्या सुरांनी संपूर्ण महाराष्ट्रावर मोहिनी घातल्यानंतर बालकलाकार हर्षद नायबळची (Harshad Naybal) आता मालिकाविश्वात एण्ट्री होणार आहे. स्टार प्रवाह वाहिनीवर १७ जानेवारीपासून सुरु होणाऱ्या ‘पिंकीचा विजय असो’ या नव्या मालिकेत तो पिंकी या मुख्य पात्राच्या भावाची भूमिका साकारणार आहे. दिप्या असं त्याच्या व्यक्तिरेखेचं नाव असून पिंकी आणि पिंकीची लहान बहीण निरीला नेहमी साथ देणारा असा हा लाडका भाऊ आहे. वयाने लहान असला तरी तितकाच समंजस आणि वडिलांच्या मेहनतीची जाण असलेला हा दिप्या आहे.

हर्षदला गाण्याची आवड तर आहेच. मात्र या मालिकेच्या निमित्ताने त्याची अभिनयाची आवडही जोपासली जाणार आहे. पिंकीचा विजय असो ही त्याची पहिलीच मालिका असून तो या भूमिकेसाठी खूपच उत्सुक आहे. सेटवर हर्षद सर्वांचा लाडका असून तो आपल्या गाण्याने सर्वांचंच मनोरंजन करत असतो. ‘पिंकीचा विजय असो’ ही नवी मालिका १७ जानेवारीपासून सोमवार ते शनिवार रात्री ११ वाजता प्रेक्षकांच्या भेटीला येणार आहे.

'सूर नवा ध्यास नवा- छोटे सूरवीर' या कार्यक्रमातून हर्षद घराघरात पोहोचला. हर्षदने त्याच्या गायनकौशल्याने सर्वांना भुरळ घातली. 'पिंकीचा विजय असो' या मालिकेत अभिनेत्री शरयू सोनावणे मुख्य भूमिका साकारणार आहे. शरयू ही नवोदित अभिनेत्री असून तिला डान्सचीही फार आवड आहे.