कर्जमुक्‍तीसाठी 40 हजारांवर शेतकऱ्यांनी केली आधार जोडणी

औरंगाबाद : महाविकास आघाडी सरकारतर्फे जाहीर करण्यात आलेल्या महात्मा जोतिराव फुले शेतकरी कर्जमुक्‍ती योजनेसाठीची प्रक्रिया बॅंकांतर्फे सुरू करण्यात आली आहे. या माध्यमातून बॅंकांतर्फे कर्जदार शेतकऱ्यांना आधार कार्ड बॅंक खात्याशी जोडण्याच्या सूचना देण्यात येत आहेत. त्यानुसार जिल्हा बॅंक, ग्रामीण बॅंक आणि व्यापारी बॅंकांतर्फे ग्राहकांना या सूचना दिल्या जात आहेत. यातून जिल्हा बॅंकेच्या 40 हजार 461 सभासदांनी आपले खाते आधार कार्डला लिंक केल्याची माहिती सोमवारी (ता.20) जिल्हा उपनिबंधक अनिलकुमार दाबशेडे यांनी दिली.

 हेही वाचा - अॅकॅडमिक ऑडिट नसल्यास महाविद्यालयांचे संलग्निकरण रद्द
जिल्हा बॅंकेच्या माध्यमातून 1 लाख 20 हजार सभासदांना 950 कोटींचे कृषिकर्ज वाटप करण्यात आले. महाविकास आघाडी सरकारने दोन लाखांपर्यत कर्ज घेतलेल्या शेतकऱ्यांचे पीककर्ज माफ करण्याचा निर्णय घेतला आहे. एक एप्रिल 2015 ते 31 मार्च 2019 या कालावधीत घेतलेले व 30 सप्टेंबर 2019 रोजी थकीत असलेले अल्पमुदत पीककर्ज आणि अल्पमुदत पीक पुनर्गठित कर्ज माफ करण्याचा निर्णय घेतला आहे. यात राष्ट्रीयीकृत बॅंका, व्यापारी बॅंका, जिल्हा बॅंका, ग्रामीण बॅंकांसह विविध कार्यकारी सोसायट्या यांच्याकडून शेतकऱ्यांनी घेतलेले कर्ज माफ होणार आहे. 

हेही वाचा -  आंतरराष्ट्रीय गाजलेले चित्रपट पाहायचेत? चला औरंगाबादला! 

15 हजार शेतकऱ्यांनी अद्याप आधार कार्ड जोडले नाही

यासाठी बॅंकांतर्फे शेतकऱ्यांना आधार कार्ड जोडण्याच्या सूचना देण्यात येत आहेत. जिल्हा ग्रामीण बॅंकेतर्फे जिल्ह्यातील 1 लाख 11 हजार 920 शेतकरी सभासदांपैकी 55 हजार 687 शेतकऱ्यांनी आधार कार्ड बॅंक खात्याशी जोडले होते. तर 56 हजार 233 शेतकऱ्यांचे आधार कार्ड जोडणे (लिंकिंग) बाकी होते. जिल्हा उपनिबंधक कार्यालयाने केलेले आवाहन आणि बॅंकांनी केलेल्या आवाहनानुसार 40 हजार 461 शेतकऱ्यांनी आपले आधार कार्ड खात्यांशी जोडले. तर उर्वरित 15 हजार 772 शेतकऱ्यांनी अद्यापही ही प्रक्रिया केलेली नाही. त्यांनी तत्काळ आपले आधार कार्ड बॅंकेशी लिंक करावेत, असे आवाहन जिल्हा उपनिबंधक कार्यालयातर्फे करण्यात येत आहे. 

जाणून घ्या - नरवीर तान्हाजी मालुसरे यांच्या बाराव्या पिढीत सध्या कोण काय करतेय, वाचा...