गाळे बांधण्यास विरोध करत ग्रामसेवकावर प्राणघातक हल्ला, औरंगाबाद जिल्ह्यातील घटना

देवगाव रंगारी (जि.औरंगाबाद) : या जागेवर गाळे का बांधतात असे म्हणत गावातील चार जणांनी ग्रामसेवकावर प्राणघातक हल्ला केल्याची घटना खामगाव (ता.कन्नड) येथे शुक्रवारी (ता.नऊ) दुपारी घडली. या प्रकरणी चार जणांविरोधात देवगाव रंगारी पोलिस ठाण्यात गुन्हा दाखल करुन त्यांना अटक करण्यात आली आहे. या प्रकरणी  ग्रामसेवक कल्याण साहेबराव पाटील, खामगाव यांनी फिर्याद दिली आहे. फिर्यादीत म्हटले आहे, की  शुक्रवारी (ता.नऊ) दुपारी बारा वाजण्याच्या सुमारास खामगाव मिळकत क्रमांक २९७ मध्ये  ग्रामपंचायतीच्या वतीने सहा गाळ्यांचे बांधकाम चालू करण्याचे नियोजन करत असताना सदरचे बांधकामासाठी सर्व साहित्य घेऊन नियोजित जागेवर पडलेले असून आज गाळ्याचे पायाचे (बेसमीट) बांधकाम सुरू करण्यासाठी सरपंच योगेश जगन्नाथ कवडे यांच्यासह ग्रामसेवक उभे असताना बापू हरि खडे, सागर हरी खडे, हरी शेकु खडे, संजय हरी खडे हे चौघे येथे येऊन या जागेवर बांधकाम करु नये म्हणून धक्काबुक्की करु लागले.

मैत्रीच्या नात्याला काळिमा फासणारी घटना, पतीच्या मित्रानेच पत्नीवर तीन वर्षे अत्याचार करुन उकळले पैसे

त्यावेळी ग्रामसेवक यांनी समजून सांगण्याचा प्रयत्न केला असता कामावरील मजुर वाल्मिकी काळे हे काम करीत असताना त्यास बाजूला जाण्यासाठी सांगत बापू हरि खडे यांनी ग्रामसेवक यांच्यावर लोखंडी राॅडने डोक्यावर मारत प्राणघातक हल्ला केला. सागर खडे, हरी खडे व संजय खडे यांनी ग्रामसेवकांच्या पायावर आणि पाठीवर काठीने मारहाण केली. येथून कसाबसे पळ काढून जीव वाचवून बाजूला ते पळाले. खामगाव येथील ग्रामस्थांनी आणि सरपंचांनी जखमी ग्रामसेवकाला खासगी वाहनातून देवगांव रंगारी येथील ग्रामीण रुग्णालयात दाखल केले. मार जास्त असल्याने त्यांना पुढील उपचारासाठी औरंगाबाद येथील खासगी रुग्णालयात दाखल करण्यात आल्याची माहिती पोलिसांनी दिली. 

'रेमडीसिव्हीर'साठी पुण्याहून लातूरच्या अधिकाऱ्यांना फोन, मोबाईल क्रमांक व्हायरल होताच औषधांच्या मागणीसाठी हजारो कॉल

या फिर्यादीवरून बापू हरि खडे, सागर हरी खडे, हरी शेकु खडे, संजय हरी खडे यांच्या विरोधात सरकारी कामात अडथळा आणुन प्राणघातक हल्ला केल्याप्रकरणी  गुन्हा दाखल करण्यात आला आहे. देवगाव रंगारी पोलिसांनी चौघांना ताब्यात घेऊन अटक करण्यात आली आहे. याबाबत सहायक पोलीस निरीक्षक संजय अहिरे यांच्या मार्गदर्शनाखाली पोलिस उपनिरीक्षक शैलेश जोगदंड तपास करित आहेत.

संपादन - गणेश पिेटेकर