शंभर दिवसांनंतरही गर्दी, देतेय कोरोनाला वर्दी!

औरंगाबाद - विनाकारण बाहेर पडू नका, असे पोलिस आणि महापालिका प्रशासनाकडून कितीही ओरडून सांगितले जात असले तरी हजारोंच्या संख्येने नागरिक रस्त्यांवर येत आहेत. बाजारपेठेतही जिकडेतिकडे गर्दीच गर्दी आहे. ही गर्दीच कोरोनाला वर्दी देत आहे. त्यामुळे कोरोनाच्या शंभर दिवसांनतरही शहरात संसर्गाची भितीच राहिली नसल्याचे चित्र आहे. 

या आवडत्या पक्षापासून माणसांना भिती अॅलर्जी, दम्याची : वाचा....

ग्रामीण भाग सजग, शहरवासी गाफील
मार्चमध्ये कोरोनाचा रूग्ण सापडल्यानंतर शहरवासीयांना धोक्याची जाणीव झाली. पण खऱ्या अर्थाने ग्रामीण भागाने कोरोनाला गांभीर्याने घेतले. गावेच्या गावेच सील झाली. बाहेरच्यांना गावात येण्यास बंदी घालण्यात आली. तसेच गावातील नागरिकांनाही बाहेर जाण्यास मज्जाव केला गेला. त्यामुळे ग्रामीण भागात कोरोना अजूनही नियंत्रणात आहे. शहरवासीयांना मात्र अजूनही या आजाराचे गांभीर्य असल्याचे दिसत नाही. सुरवातीला प्रशासन सुस्त होते. पोलिस, महापालिका आणि जिल्हा प्रशासनात समन्वय नव्हता. परिणामी शहरात बाहेर जिल्ह्यातून तसेच परराज्यातूनही लोंढेच्या लोंढे सुखनैव आले. काहींची तपासणी झाली तर काहीजण गुपचूप आले. यातील अनेकजण कोरोना घेऊनच आले होते. शिवाय कडक लॉकडाऊनच्या काळातही गल्ल्यांमध्ये नागरिक रस्त्यांवर येतच होते. सूचनांचे पालन करीत नव्हते. काही क्वारंटाईन बहाद्दर तर पत्ते, कॅरम खेळण्यासाठी बाहेर एकत्र यायचे. अनेकजण व्यायामासाठी फिरायचे. जुन्या शहरात रस्तोरस्ती गर्दी होत होती. त्यामुळे कोरोना झपाट्याने पसरला. बळींची संख्याही दीडशेचा टप्पा गाठण्याच्या मार्गावर आहे. 

लॉकडाउनचा ‘मुहूर्त’ साधून बालविवाहाचे ‘शुभमंगल’!  

अद्यापही गांभीर्य नाहीच 
सध्या शहरातील नवीन वस्तीत लागण झालेल्यांचे आकडे रोजच समोर येत आहेत. एन-1 मधील एका रूग्णापासून सुरवात केलेल्या कोरोनाचे आता तीनशेच्यावर हाॅटस्पाॅट झालेले आहेत. तरी नागरिक काहीही ऐकण्याच्या मनस्थितीत नाहीत. अनेकजण तर विनामास्क बाहेर पडतात. यात तरूणांचे प्रमाण अधिक आहे. अशा तरूणांमुळे घरातील ज्येष्ठांना कोरोनाला जीव गमवावा लागल्याच्या घटनाही या शंभर दिवसात घडल्या. दूध, भाजीच्या नावाखाली दिवसभर बाहेर राहणाऱ्यांची संख्या अजूनही शेकडोंच्या घरात आहे. बाजारपेठेत तर कित्येक ग्राहक विनामास्क येतात, थर्मलगन, आक्सिमीटर लावू देत नाहीत, त्यामुळे दुकानदारही वैतागले आहेत. काही लोकांच्या बेजबाबदार वागण्यामुळेच कोरोनाने शहरात पाय रोवले आहेत.