लोकवर्गणी जमा करणार आहात मग हे वाचा

 औरंगाबादः जिल्ह्यातील सर्व गणेश उत्सव साजरा करण्यासाठी इच्छुक मंडळाच्या पदाधिकाऱ्यांना धार्मिक व सार्वजनिक स्वरुपाच्या कार्यक्रमाकरीता लोक वर्गणी (देणगी) जमा करावयाची असल्यास सहाय्यक धर्मादाय आयुक्तांची पूर्वपरवानगी घेणे बंधकनकारक आहे.

संबंधितांनी जिल्ह्याच्या सहाय्यक धर्मादाय आयुक्त कार्यालयामार्फत ऑनलाईन किंवा ऑफलाईन (प्रत्यक्ष कार्यालयात) येऊन परवानगी घ्यावी असे सहाय्यक धर्मादाय आयुक्त म. स. बुधवंत यांनी कळविले आहे. सन २०२० साठी परवानगी देण्याचे काम सुरु झाले आहे. ही परवानगी २२ ऑगस्ट २०२० पर्यंत कार्यालयीन वेळेत व सार्वजनिक सुट्टीचे दिवस वगळून देण्यात येणार आहे. 

ऑनलाईन परवानगी करिता धर्मादाय आयुक्त विभागाचे www.charity.maharashtra.gov.in या संकेतस्थळावर मंडळाची नोंदणी करुन मिळविता येऊ शकते. संकेत स्थळावर प्रणाली मार्गदर्शक या सदराखाली कलम ४१ (क) ची परवानगीवर ऑनलाईन नोंदणी प्रक्रियेची माहिती पाहिल्यास पीपीटी फॉरमॅट मध्ये उपलब्ध आहे. सर्व इच्छुक मंडळांनी आपआपल्या सोईप्रमाणे ऑनलाईन, ऑफलाईन अर्ज लवकरात लवकर करावे व ऐनवेळी होणारी गैरसोय टाळावी.

हेही वाचा- लाॅकडाऊनमध्ये बेकायदा प्लाॅटींग

ज्या संस्था, संस्था नोंदणी अधिनियक १८६० किंवा महाराष्ट्र सार्वजनिक विश्वस्त व्यवस्था अधिनियक १९५० अन्वये नोंदविण्यात आलेल्या असतील व त्यांचे उद्देशात गणेश उत्सव साजरा करणे हा असेल त्यांनी वेगळी परवानगी घेण्याची आवश्यकता नाही. 

मागील वर्षीचा हिशोब सादर करणे आवश्‍यक 

ज्या मंडळांनी मागील वर्षी परवानगी घेतली असेल व उत्सव साजरा केला असेल त्यांनी मागील वर्षीचा हिशोब सादर करणे बंधनकारक आहे. त्याप्रमाणे नवीन मंडळांनी अर्ज करतेवेळी त्या क्षेत्रातील महापालिका, नगरपालिका, ग्रामपंचायत, नगरपंचायत व इतर स्थानिक स्वराज्य संस्थांकडून ज्या ठिकाणी गणेश उत्सव साजरा करण्याची अनुमती असल्याचे पत्र व जागा मालकाची ना-हरकत जोडणे बंधनकारक आहे.