मनोरुग्णांना आता घाटीतच मिळणार पूर्ण उपचार

औरंगाबाद- शासकीय वैद्यकीय महाविद्यालय व रुग्णालयात (घाटी) मनोविकृतिशास्त्रात पदव्युत्तर अभ्यासक्रम सुरू करण्यासाठी भारतीय आयुर्विज्ञान परिषदेने (एमसीआय) 10 जानेवारीला मान्यता दिली आहे. एमडी सायकिऍट्री हा मराठवाड्यातील पहिला अभ्यासक्रम सुरू करण्याचा मानही घाटीने मिळवला आहे. या अभ्यासक्रमासाठी तीन सीट्‌सला एमसीआयने मान्यता दिल्याची माहिती प्रभारी अधिष्ठाता डॉ. कैलास झिने यांनी दिली. 

हेही वाचा -'तान्हाजी'तील 'चुलत्या' नेमका आहे तरी कोण, वाचा संघर्ष...

जालन्याचे मनोरुग्णालय रखडले
मराठवाड्यात विभागीय पातळीवर शासकीय मनोरुग्णालय नाही. प्रादेशिक मनोरुग्णालयाला जालना येथे उभारणीला मंजुरी मिळाली असली तरी प्रत्यक्षात रुग्णसेवा मिळण्याला किती वर्षे लागतील हे स्पष्ट नाही. त्यामुळे गोरगरीब मनोरुग्णांना खासगी रुग्णालय किंवा येरवडा येथे जाऊन उपचार घ्यावे लागत होते. दरम्यान, अधिष्ठाता डॉ. कानन येळीकर यांनी अधिष्ठाता पदाचा पदभार स्वीकारल्यावर मनोविकृती विभागाचा आंतररुग्ण विभाग कार्यान्वित केला. जिल्ह्यात गोरगरीब रुग्णांना हा एकमेव आसरा आहे. त्यानंतर त्यांनी मनोविकृतिशास्त्र पदव्युत्तर अभ्यासक्रम सुरू करण्याची तयारी सुरू केली. त्यासाठी डॉ. संजीव सावजी यांची प्राध्यापक म्हणून कंत्राटी नियुक्ती केली. 

जाणून घ्या -निवृत्त शिक्षिकेचे मंगळसूत्र धूम स्टाईलने हिसकावले​

मनोचिकित्सक घडतील
घाटीने 2020 मध्ये हा अभ्यासक्रम सुरू करण्याचे लक्ष्य ठेवले होते. 29 नोव्हेंबर 2019 ला एमसीआयकडून पाहणी झाली त्यात भौतिक आवश्‍यक निकष पूर्ण केल्याने एमसीआयने एमडी सायकिऍट्रीच्या तीन जागा मंजूर केल्या. वर्ष 2020 या शैक्षणिक वर्षात या अभ्यासक्रमासाठी प्रवेश प्रक्रिया होण्याची शक्‍यता घाटी प्रशासनाने व्यक्त केली. मनोविकृतीच्या पीजीमुळे मराठवाड्यातील विद्यार्थी तयार होतील. मनोचिकित्सक घडतील, शिवाय रुग्णांनाही फायदा होईल, विश्वास डॉ. येळीकर यांनी व्यक्त केला. 

अधिष्ठाता डॉ. येळीकर यांनी एमडी सायकिऍट्री सुरू करण्यासाठी सर्वतोपरी मदत केली. त्यांनी पाठपुरावा केला आणि आम्ही प्रयत्न केले. यात रुग्णालय प्रशासनाने केलेल्या मदतीमुळे हे शक्‍य झाले.
डॉ. प्रदीप देशमुख, मनोविकृती विभागप्रमुख, घाटी