कटिंगवर टक्कल पण दाढीवर सापडेना शक्कल!

औरंगाबाद- सलूनची दुकाने दोन-अडीच महिन्यांपासून बंद आणि त्यातच कोरोनाच्या संसर्गाची भिती पाठिशी असल्याने घरच्या घरी दाढी करण्याची वेळ आली आहे. परंतु, ९० टक्के लोकांना याची सवय राहिलेली नाही. त्यांनी घरी दाढी घोटताना काळजी घ्यायलाच हवी, अन्यथा त्वचेचीच ‘हजामत’ होऊ शकते! असा सल्ला त्वचारोगतज्ज्ञ आणि व्यावसायिक सलूनचालकांनी दिलाय. 

हेही वाचा:शेतकऱ्यांनो...निंबोळी अर्क तयार करण्याची हीच खरी वेळ, विनाखर्च बनविण्याची ही आहे पद्धत

दोन महिन्यांपासून दुकाने बंद 
शहरात लॉकडाउन लागू झाले आणि जीवनावश्‍यक वस्तु वगळता सर्वच दुकाने बंदचे आदेश निघाले. कोरोनाचा संसर्ग होऊ शकेल, अशा ठिकाणांमध्ये हेअर सलूनचाही समावेश असल्याने ही दुकानेही तेव्हापासून बंद झाली. कटिंगचा प्रश्‍न साधारणपणे महिनाभरानंतरच येतो, पण दाढीचे खुंट तर आठवड्याला ‘आ’ वासून तयारच असतात. शिवाय डोक्यावरील केस कटिंगचा प्रश्‍न अनेकजण टक्कल करून सोडविताहेत पण दाढीच्या हजामतीचे काय करणार? त्यामुळेच आता बाजारातील ‘आधुनिक वस्तऱ्यां’ना चांगलाच भाव आलाय. तथापि, घरीच दाढी करताना काळजी घेणे आवश्‍यक आहे. 

हे वाचंलत का? - आता पाच मिनिटांत कोरोनाचे निदान; राज्यातील पहिलाच प्रयोग

अशी घ्या काळजी 
व्यावसायिक सलूनचालक व महाराष्ट्र नाभिक महामंडळाचे कोषाध्यक्ष सोपान शेजवळ यांनी सांगितले, की सध्याच्या काळात घरी दाढी करताना सुरवातीला हाताला सॅनिटायझर लावायला हवे. साबण किंवा शेवींग क्रीम लावल्यानंतर दाढी चांगली भिजू द्यावी, म्हणजे केस काढताना त्रास होत नाही. त्यासाठी गरम किंवा कोमट पाणी घेतल्यास उत्तम. शक्यतो एकच हात व्यवस्थित घेतल्यास दाढी चांगली होते. उगाच गुळगुळीत करण्याच्या नादात दोन-तीन हात मारू नये आणि उलटा हात तर कधीच घेऊ नये. कारण त्यानंतर काही दिवसांनी दाढीचे केस कडक, राठ होतात. अक्षरशः बारीक सुया टोचल्यासारखे वाटते. दुसरी बाब म्हणजे, दाढी झाल्यावर ‘आफ्टर शेव’ चांगल्या दर्जाचे आणि अँटीसेप्टींग घटक असलेले वापरावे. म्हणजे, चुकून ब्लेड लागल्यास झालेली जखम लवकर भरून निघेल. दाढी झाल्यानंतर सर्व साहित्य निर्जंतूक करून काही वेळ उन्हात ठेवावे. 

लॉकडाउन असो की नंतरचा काळ, दाढी शक्यतो घरीच करायची सवय ठेवावी. यामुळे ‘क्रॉस इन्फेक्शन’ टाळले जाते. जास्त गुळगुळीत करण्याच्या भानगडीत पडू नये. दुसरी गोष्ट म्हणजे, सद्यस्थितीत अमेरिकन गाईडलाईननुसार, मास्क व्यवस्थित फिट बसला पाहिजे, अशा पद्धतीने दाढीवरील केस काढावेत. या गाईडलाईन्स वैद्यकीय क्षेत्रासाठी असल्या तरी सर्वांसाठी फायदेशीर आहेत. शिवाय दाढी झाल्यानंतर साबणाने चेहरा धुवून काढावा आणि मॉइश्‍चरायझर लावावे. ज्यांना ड्रायनेसचा त्रास असतो त्यांनी ‘आफ्टर शेव’पेक्षा मॉइश्‍चरायझर लावणे केव्हाही चांगले. 
डॉ. अनुपम टाकळकर, त्वचारोगतज्ज्ञ