शहागंजच्या घड्याळाची पुन्हा टिकटिक! दोन आठवड्यांत कामाला सुरुवात

औरंगाबाद : शहागंज चमन येथील ऐतिहासिक टॉवरवरील घड्याळ मागील अनेक वर्षांपासून बंद आहे. आतापर्यंत याकडे महापालिकेचे दुर्लक्ष झाले. मात्र, आता या घड्याळाच्या दुरुस्तीचे व टॉवरच्या सुशोभीकरणाचे काम स्मार्ट सिटीच्या माध्यमातून सुरू होणार आहे. साधारणतः दोन आठवड्यांत या कामाची निविदा प्रसिद्ध होणार असल्याची माहिती सूत्रांनी दिली.

जायकवाडी धरणाचे १८ दरवाजे पुन्हा उघडले, गोदावरी दुथडी वाहू लागली

हैदराबाद संस्थानच्या काळात १९३० मध्ये शहागंज चमन येथील या ऐतिहासिक घड्याळाची निर्मिती झाली आहे. तांत्रिक कारणांमुळे मागील काही वर्षांपासून ती बंद पडली. ती आजतागायत दुरुस्त करण्यात आलेली नाही. मध्यंतरी अनेकदा शहरातील काही संस्थांनी, तसेच पालिका प्रशासनाने या घड्याळ दुरुस्ती करण्याच्या हालचाली केल्या; मात्र प्रत्यक्षात काम झाले नाही. दरम्यान, वर्षभरापूर्वी स्मार्ट सिटीतून हे काम करण्याचा निर्णय पालिकेतील सत्ताधारी व प्रशासनाने घेतला आहे. हे काम मार्गी लावण्याचा निर्णय मागील महिन्यात झालेल्या स्मार्ट सिटीच्या बैठकीत घेण्यात आला.

दोन आठवड्यांत निविदा
त्यानुसार आगामी दोन आठवड्यांत या कामाची निविदा प्रसिद्ध होणार असल्याचे सूत्रांनी सांगितले. तथापि, याबाबत ऐतिहासिक वास्तूंच्या कामाच्या स्मार्ट सिटीच्या प्रकल्प व्यवस्थापक स्नेहा बक्षी यांनी सांगितले की, इंटेक या कन्सलटंट कंपनीकडून या कामाचा आराखडा तयार केला आहे. लवकरच यासंबंधीची निविदा प्रसिद्ध केली जाणार असल्याच्या सूत्रांच्या माहितीलाही त्यांनी दुजोरा दिला.

संपादन - गणेश पिटेकर