Gangapur News : स्वातंत्र्यानंतर पहिल्यांदाच वाहेगाव ते मुद्देशवाडगावच्या रस्त्यावर डांबर

गंगापूर : स्वातंत्र्यानंतर पहिल्यांदाच वाहेगाव ते मुद्देशवाडगाव (ता. गंगापूर) असा प्रशस्त रस्ता झाला आहे. त्यामुळे वाहेगाव येथील ग्रामस्थांननी वहिवाटच बदलली असून, पारंपरिक मांजरी (ता. गंगापूर) रस्त्याला फाटा देऊन येथील ग्रामस्थांनी मुद्देशवाडगावची वाट धरली आहे.

आमदार रमेश बोरणारे यांच्या प्रयत्नातून मुख्यमंत्री ग्रामसडक योजनेतून सात किलोमीटर अंतराच्या या रस्त्याला सहा कोटींचा निधि मंजूर झाला आहे. पूर्वी वाहेगाव ते मुद्देशवाडगाव अशी पाऊल वाट होती. गाडी बैलाच्या माध्यमातून लोक शेतात जायची.

याच रस्त्यावर अनेक वस्त्या आहेत. त्यांना पावसाळ्यात जाणे-येणे म्हणजे मोठे संकट असायचे. रस्ता झाल्यावर त्यांच्या जीवनात मोठा प्रकाश पडला आहे. शाळकरी विद्यार्थ्यांसह रुग्णांना व शेतात जाणार्‍या नागरिकांची देखील सोय झाली आहे.

वाहेगाव ते मुद्देशवाडगाव असा चार किलोमीटरचा रस्ताच नव्हता. गाडी बैलागी वाट होती. पण मुद्देशवाडगाव ते वैजापूर असा तीन किलोमीटर रस्ता तीस वर्षापूर्वी झाला होता. मागील अनेक वर्षापासून हा रस्ता अतिशय खराब होता.

५३ गावातील मोठे गाव

वैजापूर मतदार संघातील ५३ गावातील वाहेगाव मोठे गाव समजले जाते. या गावाला जोडणारा मुख्य रस्ता वाहेगाव ते मांजरी अतिशय खराब झाला आहे. या रस्त्यावर देखील डांबर पडावे अशी मागणी होत आहे. आमदार रमेश बोरणारे यांच्या माध्यमातून ५३ गावात अनेक रस्त्यांचे जाळे घट्ट होत आहे. स्वातंत्र्‍यानंतर अनेक गावांना पहिल्यांदाच रस्ते झालेले दिसत आहेत.

रस्ते चांगले असले तरच माणसांची प्रगती होत असते. आमदार झाल्यावर पहिल्यांदा रस्त्याची वीण घट्ट करायची असा निर्धार केला. मुख्यमंत्री एकनाथ शिंदे यांची मजबूत साथ कामी आली. त्यामुळे मतदार संघात अनेक रस्त्यांचे कामे पूर्ण करता आली. अजून अनेक रस्ते प्रस्तावित आहेत.

- रमेश बोरणारे (आमदार, गंगापूर वैजापूर)