Maratha Reservation: जरांगेशी खोतकरांची पुन्हा चर्चा पण तोडगा नाहीच.. सरकारचे शिष्टमंडळ येणार भेटीला

जालन्यात मराठा आंदोलकांवर झालेल्या लाठीमाराचे पडसाद आजही राज्यभरात दिसून येत आहेत. राज्याच्या अनेक भागांमध्ये आजही बंदची हाक देण्यात आली आहे. बंदला नागरिकांचा मोठा प्रतिसाद मिळत आहे. याचा मोठा फटका एसटी बसला झाला आहे. दरम्यान जालना जिल्ह्यातील अंतरवाली सराटी येथे सुरू असलेल्या उपोषणाला राज्यभरातून पाठिंबा दिसून येत आहे.

मराठा समाजाला आरक्षण देण्याच्या मागणीला राज्यात मोठा प्रतिसाद मिळत आहे. यावर तोडगा काढण्यासाठी सरकार प्रयत्न करत आहेत. सरकारने उपोषणकर्ते मनोज जरांगे यांची मनधरणी करण्यास सुरूवात केली आहे. मात्र, आरक्षणाचा जीआर आल्याशिवाय आपण उपोषण मागे घेणार नाही अशी भूमिका मनोज जरांगे यांनी घेतली आहे.

त्याचबरोबर आज पुन्हा एकदा सरकारचे प्रतिनिधी म्हणून अर्जुन खोतकर यांनी जालन्यामध्ये जाऊन आज पुन्हा एकदा मनोज जरांगे यांच्याशी चर्चा केली आहे. कालही अर्जुन खोतकर यांनी मनोज जरांगे यांची भेट घेतली होती. त्यानंतर मुख्यमंत्री एकनाथ शिंदे यांच्याशी बोलणं करुन दिलं होतं. आजही खोतकरांनी मनोज जरांगे यांची भेट घेतली त्यांच्याशी चर्चा केली. त्याचबरोबर आज सरकारचं शिष्टमंडळ आज अंतरवाली सराटी गावात मनोज जरांगे यांच्याशी चर्चा करण्यासाठी जाणार आहे. आज तरी यावर तोडगा निघतो का ते पाहणंही महत्त्वाचं ठरणार आहे.

मनोज जरांगे यांच्यासह उपोषणकर्त्यांशी चर्चा करण्यासाठी आज (5 सप्टेंबर) सरकारच्या शिष्टमंडळ भेट घेणार आहे. या शिष्टमंडळामध्ये औरंगाबाद जिल्ह्याचे पालकमंत्री संदिपान भुमरे, आरोग्यमंत्री गिरीश महाजन, गृहनिर्माण मंत्री अतुल सावे आणि उदयनराजे भोसले हे आहेत. याआधीही गिरीश महाजन यांना पाठवून सरकारच्या शिष्टमंडळाने मनोज जरांगे यांच्यासोबत चर्चा केली होती. मात्र महाजन यांना यश आलं नव्हते. त्यामुळे आज दुसऱ्यांदा सरकारचं शिष्टमंडळ अंतरवाली सराटी गावात जात आहे.