आरोग्य सेवेसाठी 'प्रहार'तर्फे चपलांचा हार घालून ठिय्या आंदोलन, लोकार्पण होऊनही प्रतिक्षा संपेना!

पीरबावडा (जि.औरंगाबाद) : टाकळी कोलते (ता.फुलंब्री) येथील आरोग्य उपकेंद्र सुरु करण्यात यावे, यासाठी प्रहार संघटनेच्या वतीने आज गुरुवारी (ता.एक) ठिय्या आंदोलन करण्यात आले. यावेळी सर्वप्रथम या आरोग्य उपकेंद्राला चपलांचा हार घालून हे आंदोलन चालू करण्यात आले. या उपकेंद्राचे बांधकाम मागील पाच सहा वर्षांपासून सुरू होते. गेल्या चार महिन्यांपूर्वी हे काम पूर्ण होऊन खासदार, आमदार यासह इतर लोकप्रतिनिधींच्या हस्ते या उपकेंद्राच्या इमारतीचा लोकार्पण सोहळा पार पडला.

मात्र हे उद्घाटन होऊन चार महिने उलटले तरी या केंद्रात कुणीही कर्मचारी नियुक्त नसून ग्रामस्थांना कोणत्याच प्रकारच्या आरोग्य सेवा मिळत नसल्याने मागील पंधरा दिवसांपासून हे उपकेंद्र चालू करावे. येथील कर्मचाऱ्यांच्या जागा भरून ग्रामस्थांना आरोग्य सेवा गावातच देण्यात याव्या. या मागणीसाठी तहसीलदार,आरोग्य अधिकारी, जिल्हाधिकारी आदी कार्यालयाला निवेदने देण्यात आली आहे. मात्र अजून सुद्धा कार्यवाही झाली नसल्याने हे आंदोलन सुरू केल्याचे प्रहारचे राहुल काकडे यांनी सांगितले.

संपादन - गणेश पिटेकर