Bakari eid 2023 : बकरी ईदच्या पार्श्वभूमीवर छावणी बाजारात लाखोंची उलाढाल

छत्रपती संभाजीनगर : बकरी ईद गुरुवारी (ता. २९) साजरी केली जाणार असून, त्यानिमित्त कुर्बानी देण्यासाठी गुरुवारच्या (ता. २२) छावणी बाजारात मोठी उलाढाल झाली. धष्टपुष्ट बकऱ्याची किंमत ६० हजारांपासून ते दीड लाखापर्यंत होती.

बकरी ईदची आतापासून तयारी सुरू आहे. कुर्बानीच्या जनावरांची खरेदी-विक्री केली जात आहे. गुरुवारी छावणी बाजारात शेळ्या-बकऱ्यासह इतर जनावरे व्यापाऱ्यांनी आणली होती. बकरी ईदसाठी जनावरे खरेदी करण्याचा आजचा शेवटचा दिवस होता. त्यामुळे शहर परिसरातील अनेक गावातील नागरिक बकऱ्या विकण्यासाठी आले होते. त्यामुळे दिवसभरात सुमारे ४० लाखांची उलाढाल झाल्याचे सांगण्यात आले.

कन्नड, वैजापूर, गंगापूर, सिल्लोड तालुक्यातील नागरिक बकऱ्यांची विक्री करण्यासाठी बाजारात आले होते. काही व्यापारी तर काही शेतकरी होते. बकरी ईद डोळ्यासमोर ठेवून मुंबईतील काही व्यापारी बकऱ्यांची विक्री करण्यासाठी छत्रपती संभाजीनगर येथे येतात. मात्र यावेळी मुंबईहून शेळ्या आल्या नाहीत. मालेगावातील काही व्यापारी बकऱ्या विकण्यासाठी शहरात दाखल झाले.

काश्‍मिरी बकरेही विक्रीला

जमनापरी, बारबरी याशिवाय छावणीच्या बाजारात काश्मिरी बकरे विक्रीसाठी उपलब्ध होते. १०,००० ते ६०,००० रुपये किमतीच्या शेळ्या बाजारात आल्या. सुंदर बकऱ्यांची किंमत ६० हजारांपासून ते दीड लाख रुपयांपर्यंत होती. एका व्यापाऱ्याने बकऱ्यांच्या विक्रीसाठी खास व्यवस्था केली होती. येथे बोकडाची किंमत ३० हजार ते ८० हजारांपर्यंत होती.