औरंगाबादमधील पाचही बंडखोरांना आमदारांना आडवं करू; खैरेंचा इशारा

औरंगाबाद : शिवसेनेचे आमदार अंबादास दानवे यांची विधानपरिषदेच्या विरोधीपक्षनेतेपदी निवड झाल्यानंतर ते पहिल्यांदा औरंगाबादचे माजी खासदार चंद्रकांत खैरे यांच्या भेटीला गेले आहेत. यावेळी चंद्रकांत खैरे यांनी औरंगाबादमधील पाचही बंडखोर आमदारांना आडवं करू, त्यांना आडवं करण्यासाठी आम्ही दोघे काफी आहोत असंही खैरे म्हणाले आहेत.

(Chandrakant Khaire On Shinde Group MLA)

शिवसेना हा आमचा परिवार आहे. बाळासाहेब हे या कुटुंबाचे प्रमुख होते, आता उद्धव ठाकरे हे या कुटुंबाचे प्रमुख आहेत. माझे आणि अंबादास दानवे यांच्याशी चांगले संबंध आहेत. अंबादास दानवे हे अभ्यासू व्यक्तिमत्व असून ते विधानपरिषेदेत विरोधीपक्षनेते म्हणून चांगलं काम करतील, देवेंद्र फडणवीस यांच्यापेक्षाही जास्त चांगलं काम ते करतील असं खैरे म्हणाले आहेत.

कुटुंबात हे तात्विक मतभेद असतात आणि अंबादास आणि माझ्या तात्विक मतभेद आहेत असंही ते म्हणाले आहेत. मी कडवट शिवसैनिक असून मी पक्षाचा आदेश पाळतो. पण औरंगाबादमधील आता जे पाच आमदार फुटले आहेत त्यांना आम्ही आडवं करणार असून अंबादास आणि मी यासाठी खूप आहोत असंही ते म्हणाले आहेत.

दरम्यान, शिवसेनेने विधानपरिषदेच्या विरोधी पक्षनेतेपदी आमदार अंबादास दानवे यांची निवड केली. त्यानंतर आम्हाला यावेळी विचारात घेतले नसून आम्हाला निवडीबद्दल विचारलं असतं तर बरं झालं असतं असं मत राष्ट्रवादीचे प्रदेशाध्यक्ष जयंत पाटलांनी व्यक्त केलं आहे. त्यानंतर ही आघाडी पर्मनंट आघाडी नसून तात्पुरती आघाडी होती असं मत काँग्रेसचे प्रदेशाध्यक्ष नाना पटोले यांनी व्यक्त केलं होतं.

महाविकास आघाडीतील मित्रपक्षांच्या या नाराजीमुळे महाविकास आघाडी फुटणार का अशा चर्चांना उधाण आलं होतं. त्यानंतर आता शिंदे गटातील औरंगाबादमधील आमदारांना आम्ही आडवं करू असा इशारा चंद्रकांत खैरे यांनी दिला आहे.