दुसरी लाट ओसरली, आता कोरोना मृत्यूदरातही घट

औरंगाबाद: कोरोनाच्या पहिल्या लाटेपेक्षा (covid 19 first wave) दुसऱ्या लाटेचा प्रकोप चिंताजनक होता. आता ही लाट ओसरली असून, मृत्यूदरातही मोठी घट (covid 19 death rate) झाली आहे. जिल्ह्याचा मृत्यूदर २.३२ टक्के झाला आहे. असे असले तरीही तिसऱ्या लाट (third wave) उसळूच नये, यासाठी प्रत्येकाने स्वतः हातभार लावण्याची व स्वतःसह कुटुंबाच्या सुरक्षिततेसाठी काळजी घेण्याची गरज आहे.

कोरोनामुळे अनेकांचे हाल झाले. रोजगार गेले, होती नव्हती ती जमापुंजीही गेली. पण, त्याहीपेक्षा लाखमोलाची माणसं, कुटुंबाचे आधारवड, ज्येष्ठ आई, वडील, मामा, काका, भाऊ व मित्र आप्तेष्ट कायमचेच कोरोनाने हिरावले. या लाटेत प्रत्येक कुटुंबाच्या घरात कोरोनाची झळ बसली. आर्थिकदृष्ट्या हाल सोसणाऱ्या कुटुंबांना मायेची माणसं गेल्याने दुहेरी संकट ओढवले. आता दुसरी लाट ओसरली.

दुसऱ्या लाटेत औरंगाबाद जिल्ह्यात दरदिवशी २५ ते ४५ रुग्णांचे मृत्यू झाले होते. परंतु, आता दिवसागणिक मृत्यूचा आकडा एकेरी आला असून, दरदिवशी सात ते नऊ मृत्यू होत आहेत. सध्याच्या स्थितीत लाट ओसरली व प्रत्यक्ष मृत्यूवर नियंत्रण मिळवण्यात यशही आले. त्यामुळे आता मृत्यूदर २.३२ एवढा आहे. सध्याच्या स्थितीत ही दिलासादायक बाब म्हणावी लागेल.