Crime news : भर रस्त्यात मारहाण करुन विद्यार्थिनीची छेड काढणाऱ्या तिघांना पोलिस कोठडी

छत्रपती संभाजीनगर : भर रस्त्यात मारहाण करुन विद्यार्थिनीची छेड काढणाऱ्या तिघा आरोपींना शनिवार (ता. २९) पर्यंत पोलिस कोठडीत ठेवण्‍याचे आदेश प्रथमवर्ग न्‍यायदंडाधिकारी आर.व्ही. सपाटे यांनी गुरुवारी (ता. २७) दिले.

शेख गयाज ऊर्फ बब्बू शेख रियाज (३०, रा. फुलेनगर, उस्मानपुरा), सोफीयान खान मुसा खान (२१, रा. आसेफिया कॉलनी) आणि नदीम खान फिरोज खान (२१, रा. मकबरा रोड, बेगमपुरा) अशी आरोपींची नावे आहेत. छत्रपती संभाजीनगर शहरातील एक मुलगी तिच्‍या दोन मित्रांसोबतल बीबी-का-मकबरा पाहण्यासाठी गेली होती. तेथे आधीपासून असलेल्या टवाळखोरांची तिच्यावर नजर गेली.

दरम्यान, तिच्यासोबत असलेला मित्रांचा आणि ती वेगवेगळ्या धर्माचे असल्याचा त्यांना संशय आला. त्यामुळे टवाळखोरांनी तरुणीला इतर समाजाच्या मुलासोबत का फिरते म्हणून तिला शिवीगाळ करुन मारहाण केली. या प्रकरणी पोलिसांनी स्वत: फिर्यादी होत बेगमपुरा पोलीस ठाण्‍यात गुन्‍हा दाखल केलेला.

न्यायालयात सहायक सरकारी वकील किशोर जाधव यांनी युक्तीवाद केला. शहरात दंगलीच्‍या पार्श्‍वभूमीवर कायदा व सुव्‍यवस्‍थेचा प्रश्‍न निर्माण झालेला असतांना आरोपींनी दोन गटात तेढ निर्माण होईल असे कृत्‍य केलेले आहे. पीडित तरुणीला शिवीगाळ, मारहाण करुन आरोपींनी तिची छेड काढली आहे. गुन्‍ह्यात आरोपींच्‍या साथीदारांना अटक करायची आहे. गुन्‍ह्यात आरोपींना प्रत्‍यक्ष, अप्रत्यक्ष कोणी मदत केली काय याचा देखील तपास बाकी असल्याने आरोपींना पोलीस कोठडी देण्‍याची विनंती न्‍यायालयाकडे केली.