धाराशिव जिल्ह्यातील जलसाठ्यांनी गाठला तळ!
२२५ प्रकल्पांत केवळ साडेपाच टक्के पाणीसाठा; तीन मध्यम, ६१ लघुप्रकल्प कोरडे
----------
धाराशिव, ता. ९ (बातमीदार) : जिल्ह्यातील मध्यम प्रकल्पही आता कोरडे पडू लागले आहेत. जिल्ह्यातील १७ पैकी तीन मध्यम प्रकल्प कोरडे पडले असून, सहा मध्यम प्रकल्पांतील पाणीपातळी जोत्याच्या खाली गेली आहे. जिल्ह्यातील सर्व २२५ प्रकल्पांमध्ये सध्या केवळ साडेपाच टक्के उपयुक्त पाणीसाठा शिल्लक राहिला आहे. त्यामुळे आगामी काळात पाणीटंचाईचे संकट अधिक तीव्र होण्याची शक्यता आहे.
जिल्ह्यात यंदा अपेक्षित पाऊस झाला नाही. त्यामुळे प्रकल्पांतील पाणीसाठ्यातही वाढ झाली नाही. संभाव्य पाणीटंचाई लक्षात घेता जिल्ह्यातील सर्वच प्रकल्पांतील पाणीसाठा पिण्यासाठी राखीव ठेवण्यात आला आहे. जिल्ह्यात एक मोठा, १७ मध्यम आणि २०७ लघुप्रकल्प आहेत. पाणीपातळीत वाढ न झाल्याने उपलब्ध उपयुक्त पाणीसाठ्यातूनच संबंधित शहरे आणि गावांना पाणीपुरवठा करावा लागत आहे.
पावसाअभावी भूगर्भातील पाणीपातळीतही वाढ झालेली नाही. त्यामुळे गावोगावी असलेल्या सार्वजनिक पाणीपुरवठ्याच्या विहिरी आणि कूपनलिकांमधील पाणी कमी होत चालले आहे. अनेक ठिकाणी विहिरी व कूपनलिका कोरड्या पडल्याने अधिग्रहणाद्वारे पाणीपुरवठा सुरू करण्यात आला आहे.
१७ पैकी तीन प्रकल्प कोरडे
जिल्ह्यातील १७ मध्यम प्रकल्पांपैकी तीन प्रकल्प कोरडे पडले आहेत, तर सहा प्रकल्पांतील उपयुक्त पाणीपातळी जोत्याखाली गेली आहे. सात प्रकल्पांमध्ये २५ टक्क्यांपेक्षा कमी, तर केवळ एका प्रकल्पात २६ टक्क्यांपेक्षा अधिक उपयुक्त पाणीसाठा शिल्लक आहे. या सर्व १७ मध्यम प्रकल्पांमध्ये मिळून केवळ ४.६० टक्के उपयुक्त पाणीसाठा शिल्लक आहे. जिल्ह्यातील २०७ लघुप्रकल्पांपैकी ६१ प्रकल्प कोरडे पडले आहेत. १०७ प्रकल्पांतील पाणीपातळी जोत्याखाली गेली आहे.
लघुप्रकल्पांमध्ये ७.१३ टक्के पाणीसाठा
४३ प्रकल्पांमध्ये २५ टक्क्यांपेक्षा कमी, सात प्रकल्पांमध्ये २६ टक्क्यांपेक्षा अधिक, तीन प्रकल्पांमध्ये ५१ टक्क्यांपेक्षा अधिक, तर एका प्रकल्पात ७५ टक्क्यांपेक्षा अधिक उपयुक्त पाणीसाठा शिल्लक आहे. सर्व लघुप्रकल्पांमध्ये मिळून केवळ ७.१३ टक्के उपयुक्त पाणीसाठा उपलब्ध आहे. मध्यम प्रकल्पांवर जिल्ह्यातील विविध शहरे आणि लगतच्या काही मोठ्या गावांतील नागरिकांची पाण्याची गरज भागवली जाते. मात्र, दिवसेंदिवस या प्रकल्पांतील पाणीसाठा घटत असल्याने आगामी काळात काही शहरांना पाणीटंचाईचा सामना करावा लागण्याची शक्यता आहे. लघुप्रकल्पांतील पाणीसाठ्याचा उपयोग पशुधनाची तहान भागविण्यासाठीही केला जातो. मात्र, यापैकी अनेक प्रकल्प कोरडे पडले असून, काही प्रकल्पांतील पाणीसाठा संपण्याच्या मार्गावर आहे. त्यामुळे आगामी काळात पशुधनासाठी पाण्याची उपलब्धता राखताना पशुपालकांना मोठी कसरत करावी लागण्याची शक्यता व्यक्त होत आहे.
