औरंगाबाद : खरेदीच्या कारणावरून झालेल्या वादातून उच्चशिक्षित विवाहितेने घेतला गळफास

औरंगाबाद : खरेदी करण्याच्या पोलिसाच्या उच्चशिक्षित (highly educated) २५ वर्षीय पत्नीने राहत्या घराच्या बेडरूममध्ये साडीच्या साहाय्याने गळफास घेऊन आत्महत्या (Suicide) केली. ही घटना बुधवारी (ता.१९) दुपारी अकरा वाजता पोलिस कॉलनी मिलकॉर्नर (Police Colony Mill Corner) येथे उघडकीस आली.

या प्रकरणी पोलिसांनी दिलेल्या माहितीनुसार, संगीता अनिल शेवाळे (२५ रा. पोलिस कॉलनी मिलकॉर्नर) असे गळफास घेतलेल्या विवाहितेचे नाव आहे. संगीता यांचा सहा वर्षांपूर्वी अनिल यांच्याशी विवाह झाला होता. अनिल हे शहर पोलिस दलात अंमलदार म्हणून नोकरीला आहेत. त्यांना चार वर्षांचा आणि एक दीड वर्षाचा मुलगा आहे. अगोदर ते पडेगाव भागात राहत होते. चार महिन्यांपूर्वी पोलिस कॉलनीत राहायला आले. दोघे स्पर्धा परीक्षेची देखील तयारी करत असल्याचे शेजाऱ्यांनी सांगितले.

दरम्यान, मंगळवारपासून शॉपिंग करण्याच्या कारणावरून दोघांत वाद झाला होता, अशी माहिती पतीने पोलिसांना दिली. त्यामुळे संगीता या तणावात होत्या. बुधवारी (ता.१९) सकाळी दोघांनी चहा घेतला. त्यानंतर त्यांच्यात वाद झाला. यावेळी रागाच्या भरात संगीता यांनी बेडरूममध्ये गळफास घेतला. संगीता बराच वेळ बाहेर न आल्याने अनिल यांनी आवाज दिला, मात्र प्रतिसाद मिळाला नाही. यावेळी शेजाऱ्यांच्या मदतीने दार तोडून बघितले असता त्यांनी गळफास घेतला होता. त्यांना तत्काळ घाटी रुग्णालयात दाखल करण्यात आले असता डॉक्टरांनी तपासून मृत घोषित केले. या प्रकरणी बेगमपुरा पोलिस ठाण्यात अकस्मात मृत्यूची नोंद करण्यात आली. पुढील तपास उपनिरीक्षक विनोद भालेराव करीत आहेत.