"मी तुझ्या घरी येतो..." मंत्री संदीपान भुमरे यांची कार्यकर्त्याला शिवीगाळ; Audio Clip Viral

पैठण : शिवसेनेचे मंत्री संदीपान भुमरे यांची एक कथित ऑडिओ क्लीप सोशल मीडियावर व्हायरल झाली आहे. यामध्ये ते आपल्या एका कार्यकर्त्याला शिवीगाळ करत आहेत. त्याचबरोबर ते या कार्यकर्त्याला धमकीसुद्धा देत आहेत. ही ऑडिओ क्लीप सोशल मीडियावर चांगलीच शेअर केली जात आहे पण या ऑडिओ क्लीपची पुष्टी सकाळ माध्यम करत नाही.

"तू लोकांच्या जीवावर उड्या मारतो का? दारू पिऊन शिव्या देतो का? तुझ्या घरी येऊन दाखवतो तुला, रात्री अपरात्री फोन करून शिव्या देतो तू" अशा शब्दांत शिवीगाळ करताना ऐकायला येत आहेत. तर समोरचा कार्यकर्ता त्यांची माफी मागत सारवासारव करताना दिसत आहेत.

या ऑडिओ क्लीपमध्ये मालपाणी या व्यक्तीचे नाव घेण्यात आले असून मालपाणी यांच्या फोनवर या कार्यकर्त्याने बापू यांना आक्षेपार्ह भाषेत टिप्पणी केल्यामुळे भुमरे यांनी या कार्यकर्त्याला शिवीगाळ करण्यात आल्याची चर्चा आहे. त्याचबरोबर रस्त्याच्या कामासंदर्भातील हा वाद असल्याचं सांगण्यात येत आहे.