Navneet Rana : काँग्रेसमुळे सामान्य जनता विकासापासून वंचित

Paithan : गेल्या ७५ वर्षांच्या काळात काँग्रेस पक्षाने सामान्य जनतेला विकासापासून वंचित ठेवले आहे, अशी टीका भाजप नेत्या खासदार नवनीत राणा यांनी शनिवारी पैठण येथे केली. लोकसभेच्या जालना मतदारसंघातील महायुतीचे उमेदवार रावसाहेब दानवे यांच्या प्रचारार्थ रोड शोच्या समारोपप्रसंगी त्या बोलत होत्या.

यावेळी उमेदवार रावसाहेब दानवे, माजी मंत्री अर्जुन खोतकर, भाजप महिला आघाडीच्या प्रदेश‌ उपाध्यक्ष रेखाताई कुलकर्णी, विधानसभाप्रमुख डॉ. सुनील शिंदे, तालुकाध्यक्ष लक्ष्मण औटे, माजी नगराध्यक्ष सूरज लोळगे व कल्याण गायकवाड यांची प्रमुख उपस्थिती होती.

नवनीत राणा म्हणाल्या, एमआयएम व काँग्रेस पक्ष जातीपातीचे राजकारण करत असून, पाकिस्तानचे गुणगान गात आहे. त्यामुळे काँग्रेसला मत देणे म्हणजे पाकिस्तानला मत देण्यासारखे आहे.

देशातील तीन कोटी महिलांना घरे, शेतकऱ्यांपासून मजूर, कामगार व महिलांना विकास योजनेचा मार्ग पंतप्रधान नरेंद्र मोदी यांनी दाखवून नवा आयाम दिला आहे. त्यामुळे मोदींना तिसऱ्यांदा पंतप्रधान करण्यासाठी तुमचे एक मत द्यावे, असे आवाहन राणा यांनी केले. यावेळी दानवे यांचेही भाषण झाले.