Sambhaji Nagar Crime : तुमचा मुलगा ड्रग्स केसमध्ये सापडलाय! ; फसव्या कॉलमुळे पालक भीतीच्या छायेत

छत्रपती संभाजीनगर : तुमचा मुलगा किंवा मुलगी ड्रग्स केसमध्ये सापडलेत, गुन्हा दाखल करायचा नसेल तर सेटलमेंट करा, असा कॉल आला तर घाबरून न जाता आधी खात्री करा. फ्रॉडस्टरकडून पैसे उकळण्यासाठी असे नवनवीन फंडे वापरण्यात येत आहेत. पालकांनी अशा फेक कॉलला बळी पडू नये, असे आवाहन सायबर सेलच्यावतीने करण्यात आले आहे. शहरातील काही पालकांना अशा प्रकारचे कॉल येण्याचे प्रकार घडत आहेत.

शहरातील एका नामांकीत महाविद्यालयात सिडको भागातील विद्यार्थिनी अभियांत्रिकीच्या प्रथम वर्षात शिक्षण घेत आहे. या मुलीच्या पालकांना मंगळवारी सकाळी अकराला अनोळखी मोबाइल क्रमांकावरून व्हॉट्सॲप कॉल आला. समोरील व्यक्तीने हिंदी भाषेत संभाषणाला सुरवात करीत मुलीबद्दल विचारले. अनोळखी क्रमांकावरून आलेल्या या कॉलवर समोरील व्यक्ती दरडावून बोलत होती.

यामुळे मुलीचे पालक टेन्शनमध्ये आले. समोरील व्यक्तीने पोलिस असल्याचे सांगत ‘मुलगी आमच्या ताब्यात असून तिला ड्रग्स केसमध्ये पकडले आहे’, असे सांगितले. तिच्या महाविद्यालयात छापा मारला असून, चार मुलींना पकडले आहे. त्यांच्या बॅगमध्ये ड्रग्स आढळून आल्याचेही या कॉलरने सांगितले. यामुळे मुलीचे पालक घाबरून गेले. त्यानंतर मुलीच्या बॅगमध्ये काही आढळले नसले, तरीसुद्धा केस करावी लागेल, अशी भीती समोरील व्यक्तीने दाखविली.

सेटलमेंट करायची असेल तर वीस हजार रुपये या क्रमांकावर पाठवा, अशी थेट मागणीच त्याने केली. दरम्यान, हा फेक कॉल असल्याचे पालकांच्या लक्षात आले होते. त्यांनी आम्ही पोलिस ठाण्यात येतो. कोणत्या पोलिस ठाण्यात यायचे सांगा, असे म्हटल्यावर समोरील व्यक्तीने कॉल कट केला. पुन्हा या क्रमांकावर पालकांनी कॉल केला असता तो लागला नाही. दरम्यान, पालकांनी मुलीला कॉल करीत ती महाविद्यालयात सुरक्षित असल्याची खात्री करून घेतल्यानंतर त्यांना हायसे वाटले.

मुलीची माहिती कशी?

या प्रकारामध्ये समोरील व्यक्तीकडे मुलीची सगळी माहिती होती. ती कोणत्या महाविद्यालयात आहे, हेदेखील त्यांना माहीत होते. मुलीच्या पालकांशी बोलताना ते सगळी माहिती असल्याचे दाखवीत होते. तथापि, या फेक कॉल करणाऱ्यांकडे हा डेटा कुठून उपलब्ध होतो, हा महत्त्वाचा प्रश्न यानिमित्ताने समोर आला आहे.

असे फंडे...असे फेक कॉल

• महावितरणच्या लोगोचा वापर करून बिल भरण्याच्या नावाखाली फेक कॉल. विशेषतः ज्येष्ठांना येण्याचे प्रकार.

• मोबाइल क्रमांकाचा लकी ड्रॉमध्ये नंबर लागल्याची थाप.

• मोबाइल क्रमांकावर मोठ्या रकमेचे रिचार्ज करून देण्याचे दाखवितात आमिष. याला अनेकजण पडतात बळी.

• न्यूड, सेक्स्टॉर्शनच्या नावाखाली महिला, तरुणींच्या फोटोंचा वापर करीत धमकी. काहीजण करीत नाहीत तक्रार.

• बँकेतून बोलत असल्याचे सांगत डेबिट, क्रेडिट कार्डच्या नावाखाली फसवणुकीचे वाढते प्रकार.