औरंगाबादमध्ये पोलिसांची मोठी कारवाई, कुरिअर कार्यालयातून ३७ तलवारी जप्त

औरंगाबाद : औरंगाबाद शहरात कुरिअरने तलवारी मागविण्यात आल्याचा प्रकार उघडकीस आला आहे. पोलिसांनी आज बुधवारी (ता.३०) निराला बाजारातील डीटीडीसी कुरिअर कार्यालयावर छापा टाकला. त्यात पार्सल बाॅक्समध्ये एक कुकरी आणि ३७ तलवारी (Swords) जप्त करण्यात आल्या. औरंगाबाद आणि जालना येथील सात ग्राहकांचे पत्ते सदरील पार्सलवर आढळले आहेत. सहायक पोलिस आयुक्त (शहर विभाग) अशोक थोरात यांना खबऱ्याकडून कुरिअरने औरंगाबादमध्ये ((Aurangabad)) तलवारी आल्याची माहिती मिळाली. (Police Raid On Currier Office, Seized 37 Swords In Aurangabad)

या माहितीवरुन क्रांती चौक पोलिस ठाण्याचे पोलिस निरीक्षक गणपत दराडे, पोलिस उपनिरीक्षक विकास खटके, प्रभाकर सोनवणे यांच्या पथकाने डिटीडीसी कुरिअरच्या कार्यालयावर छापा टाकला. व्यवस्थापकाने खरी माहिती देण्यास नकार दिल्यानंतर पोलिसांना पार्सल बाॅक्समध्ये तलवारीचा साठा आढळला.

पोलिस निरीक्षक दराडे म्हणाले, की सात ग्राहकांनी तलवारी मागवल्या होत्या. यात पाच औरंगाबादचे , तर दोघे जालन्याचे ग्राहक आहेत.