विधानसभेच्या तिकिटाचे आतापासूनच ‘टेन्शन’!

छत्रपती संभाजीनगर : लोकसभा निवडणूक झाली, की साधारणतः सहा महिन्यांनी महाराष्ट्रात विधानसभेच्या निवडणुका होणार आहेत. महायुती-महाविकास आघाडीच्या नेत्यांनी स्थानिक पातळीवर त्या-त्या विधानसभा मतदरासंघांतील विद्यमान आमदार आणि भावी आमदारांना कामाला लावले होते. आता या विद्यमान; तसेच तिकिटासाठी इच्छुक असलेल्या सर्वच पक्षांतील भावी आमदारांना टेन्शन आले आहे.

छत्रपती संभाजीनगर लोकसभा मतदारसंघात शहरातील पूर्व-पश्चिम-मध्य, तर ग्रामीणचे कन्नड, वैजापूर-गंगापूर-खुलताबाद हे विधानसभा मतदारसंघ येतात. यात शहरातील पूर्व व ग्रामीणमधील गंगापूर मतदारसंघात भाजपचे आमदार आहेत. पश्चिम, मध्य आणि वैजापूरमध्ये शिवसेना शिंदे गटाचे आमदार आहेत.

कन्नड या एकमेव विधानसभा मतदारसंघात ठाकरे गटाचे उदयसिंह राजपूत आमदार आहे. या सगळ्यांवर आपापल्या मतदारसंघांत पक्षाच्या उमेदवारांना मताधिक्य मिळवून देण्याची जबाबदारी टाकण्यात आली होती. मुख्यमंत्री एकनाथ शिंदे यांनी तर थेट मताधिक्य मिळाले नाही, तर विधानसभेला उमेदवारी देताना विचार केला जाईल, अशा इशाराच दिला होता. त्यामुळे सत्ताधारी आणि विरोधी पक्षाचे आमदार टेन्शनमध्ये आले आहेत.

संभाजीनगर लोकसभा मतदारसंघासाठी ६३ टक्के एवढे मतदान झालेले आहे. शहरातील तीनही विधानसभा मतदारसंघांचा विचार केला, तर गृहनिर्माणमंत्री अतुल सावे, पश्चिमचे संजय शिरसाट, मध्यचे प्रदीप जैस्वाल यांचे ‘प्रगतिपुस्तक’ लोकसभा निवडणुकीच्या निकालानंतर समजेल.

ग्रामीणमध्ये वैजापूर विधानसभा मतदारसंघाचे विद्यमान आमदार प्रा. रमेश बोरनारे यांना गेल्या दीड वर्षात मुख्यमंत्री एकनाथ शिंदे यांच्याकडून विकासकामासाठी भरमसाठ निधी देण्यात आला. त्यामुळे साहजिकच त्यांच्याकडून महायुतीच्या भुमरेंना सर्वाधिक मताधिक्य मिळून देण्याची चिंता आहे, तर याच मतदारसंघात महाविकास आघाडीचे चंद्रकांत खैरे यांच्यासाठी माजी आमदार भाऊसाहेब पाटील चिकटगावकर यांनी आपली सगळी शक्ती पणाला लावली. खैरेंना मताधिक्य मिळाले, तर त्यांच्यासाठी तिकिटाची लढाई सोपी राहील.

अशीच परिस्थिती गंगापूर विधानसभा मतदारसंघात कृष्णा पाटील डोणगावकर यांची असणार आहे. इथे भाजपचे विद्यमान आमदार प्रशांत बंब यांनी भुमरेंसाठी आपली सगळी यंत्रणा नियोजनबद्धपणे वापरल्याची चर्चा आहे. तीन टर्मपासून बंब या मतदारसंघाचे प्रतिनिधित्व करत असल्याने आपल्या अनुभवाचा फायदा त्यांनी कसा घेतला, याचे उत्तर निकालानंतर मिळेल.

इच्छुकांचा जीव टांगणीला

कन्नड विधानसभा मतदारसंघात पक्षफुटीनंतर उद्धव ठाकरे आणि शिवसेनेशी एकनिष्ठ राहिलेले आमदार उदयसिंह राजपूत यांची प्रतिष्ठा पणाला लागली होती. इथे त्यांना माजी आमदार हर्षवर्धन जाधव यांना रोखून खैरेंना मताधिक्य मिळवून देण्याचे मोठे आव्हान होते. यात ते यशस्वी झाले, तर त्यांना ठाकरेंकडून दुसऱ्यांदा उमेदवारीचे रिटर्न गिफ्ट मिळू शकते. एकूण भुमरे-खैरेंच्या निवडणुकीत महायुती-महाविकास आघाडीच्या आमदारांसह इच्छुकांचा जीव टांगणीला लागल्याचे चित्र आहे.