राजीनाम्यावरुन मुंडे बहीण-भाऊ पुन्हा समोरासमोर, पूजा चव्हाण आत्महत्या प्रकरणावर राजकारण!

औरंगाबाद : काही दिवसांपासून भाजपच्या नेत्या चित्रा वाघ पूजा चव्हाण आत्महत्या प्रकरणी आक्रमक झाल्याच्या दिसतात. वनमंत्री संजय राठोड यांनी राजीनामा द्यावा, अशी मागणी केली जात होती. सर्व बाजूंनी दबाव वाढल्यानंतर रविवारी राठोड यांनी मंत्रिपदाचा राजीनामा दिला आहे. पूजा चव्हाण हिच्या आत्महत्या प्रकरणावर जाहीर भूमिका घेताना माजी मंत्री पंकजा मुंडे दिसल्या नाहीत. एखाद ट्विट सोडले तर! दुसरीकडे सामाजिक न्यायमंत्री धनंजय मुंडे यांनी पूजाची हत्या नसून आत्महत्या असल्याचे औरंगाबादेत म्हटले होते. मुंडे यांच्यावर एका महिलेने अत्याचाराचा आरोप केला होता. नंतर तिने याबाबत पोलिसांकडे केलेली तक्रार मागेही घेतली आहे. धनंजय मुंडे प्रकरणावर पंकजा मुंडे यांनी सावध भूमिका घेतली होती.

वाचा - वाळूज एमआयडीसीतील प्लास्टिक कंपनीला भीषण आग, करोडो रुपयांचे नुकसान

आता पंकजा मुंडे यांनी धनंजय मुंडे यांनी मंत्रिपदाचा राजीनामा द्यावा अशी जाहीर मागणी प्रसारमाध्यमांशी बोलताना केली आहे. आतापर्यंत त्या गप्प का होत्या? पूजा चव्हाण ही त्यांच्या जिल्ह्यातील रहिवाशी आहे. पूजाने पंकजा यांच्याबरोबर कामही केलेले आहे. असे असताना त्या गप्पच होत्या. दुसरीकडे त्यांच्याच पक्षाच्या चित्रा वाघ पूजा चव्हाण प्रकरण दाबण्याचा राज्य सरकार प्रयत्न करत असल्याचा सातत्याने म्हटले आहे. चौफेर टीका आणि दबावानंतर शेवटी वनमंत्री संजय राठोड यांना राजीनामा द्यावा लागला आहे.

वाचा - औरंगाबादेत गर्दीच्या भागात लॉकडाऊनचा इशारा, कोरोना रुग्णसंख्या कमी होईना

भाजपमध्ये सर्वांत प्रभावशाली म्हणून पंकजा मुंडे यांच्याकडे पाहिले जाते. पूजा प्रकरणी वाघ या सातत्याने बोलताना दिसतात. मुंडे कुठेच दिसत नव्हत्या. आपणही महिलांवर होणाऱ्या अत्याचाराच्या घटनांबाबत संवेदनशील आहोत असे त्यांना प्रसारमाध्यमांच्या माध्यमातून सांगायचे असेल! त्यामुळे त्यांनी धनंजय मुंडे यांच्या राजीनाम्याची मागणी केली असण्याची शक्यता नाकारता येत नाही. यावर सामाजिक न्यायमंत्री काय प्रतिक्रिया देतात हे पाहावे लागेल.