Sambhaji nagar : पोलिसांच्या अंगावर फेकल्या पेट्रोल भरलेल्या बाटल्या

छत्रपती संभाजीनगर : किराडपुरा परिसरात समाजकंटकांनी दगडफेक केल्याने पोलिस जखमी झाले. पोलिसांवर पेट्रोलने भरलेल्या बॉटल्सही फेकल्या होत्या. शेवटी बळाचा वापर करून तीन ते साडेतीनच्या सुमारास जमावाला पांगविण्यात यश आले, अशी माहिती पोलिस आयुक्त डॉ. निखिल गुप्ता यांनी माध्यमांशी बोलताना दिली.

आयुक्त गुप्ता यांनी सांगितले, की रात्री अकरा ते साडेअकरादरम्यान काही तरुणांत किरकोळ भांडण झाले. दोन्ही बाजूंचे चार- चार तरुण होते. नंतर काही तरुण निघून गेले. त्यानंतर मात्र गर्दी गोळा झाली, त्या गर्दीला पोलिसांनी पांगविले. तासाभराने मोठ्या संख्येने जमाव जमला आणि जमावाने पोलिसांवर दगडफेक करण्यास सुरुवात केली.

पोलिसांनी बऱ्यापैकी नियंत्रणात आणले, मात्र समाजकंटकांची संख्या जास्त असल्याने त्यांना पांगवता आले नाही. नंतर आपण स्वतः डीसीपींसह अतिरिक्त फोर्स जाऊन घटनास्थळी धाव घेत जमाव पांगविला. साधारण एक ते दीड तास हा प्रकार सुरू होता.

काय म्हणाले पोलिस आयुक्त?

• समाजकंटकांनी त्या भागातील दिवे फोडले, दाट अंधारातही जमाव पांगविला.

• गुन्हा दाखल केला असून आठ विशेष पथके स्थापन करण्यात आली आहेत.

• एसआरपीच्या कंपन्या आल्या आहेत, इतर ठिकाणाहून वरिष्ठ अधिकारी दाखल.

• जमावाने तासभर दगडफेक केली. पोलिस महासंचालकांना घटना कळविली.