Sambhaji nagar : कंपनीत जातो म्हणत घराबाहेर पडला अन् घेतली विहिरीत उडी

छत्रपती संभाजीनगर : खासगी कंपनीत काम करणाऱ्या २० वर्षीय तरुणाने विहिरीत उडी घेत आत्महत्या केली. हा प्रकार बुधवारी (ता.२८) रात्री नऊदरम्यान शरणापूर परिसरात समोर आला. विजय आप्पासाहेब उभेदळ (२० रा. वडगाव कोल्हाटी परिसर) असे त्या मृत कामगाराचे नाव असल्याची माहिती दौलताबाद पोलिसांनी दिली.

पोलिसांनी सांगितले की, विजय हा मंगळवारी रात्रपाळीचे काम असल्याचे सांगत घराबाहेर पडला होता. बुधवारी दिवसभर तो नंतर घरी गेलाच नाही. दरम्यान बुधवारी रात्री नऊदरम्यान शरणापूर शिवारातील गट क्र. १३ येथील एका विहिरीत मृतदेह आढळल्याचे समोर आले असता पोलिसांनी घटनास्थळी धाव घेतली.

त्यावेळी तो मृतदेह विजयचा असल्याचे समोर आले. पोलिसांनी मृतदेह काढून घाटीत उत्तरीय तपासणीसाठी पाठविला. विजय हा रागीट स्वभावाचा होता, किरकोळ वादातून त्याने रागाच्या भरात याआधीही घर सोडले होते अशी माहिती विजयचे वडील अप्पासाहेब उभेदळ यांनी दिली. याप्रकरणी दौलताबाद पोलिसांत नोंद करण्यात आली असून अधिक तपास पोलिस नाईक विठ्ठल सर्जेराव खंडागळे हे करत आहेत.