Crime News : मुलाचे भांडण सोडवायला गेलेल्या आईच्या डोक्यात घातला दगड

छत्रपती संभाजीनगर : घरासमोर राहणाऱ्या कुटुंबाने एका युवकाला चाकूच्या धाकाने मारहाण केली तर ही घटना दिसताच भांडण सोडविण्यासाठी मध्ये पडलेल्या आईच्याही डोक्यात दगड घालून गंभीर जखमी केल्याची घटना घडली. याप्रकरणी तिघांविरोधात सातारा पोलिस ठाण्यात गुन्हा दाखल करण्यात आला आहे. ही घटना १४ एप्रिलला राहुलनगर परिसरात घडली.

दीपक थोरात, सुशीला दीपक थोरात आणि अनिल बनसोडे (रा.तिघेही राहुलनगर) अशी त्या मारहाण करणाऱ्या आरोपींची नावे आहेत. याप्रकरणी शोभाबाई विठ्ठल वाटोडे (६०, रा.राहुलनगर, गल्ली क्र.५) यांनी दिलेल्या फिर्यादीनुसार त्या नातवासह राहुलनगर परिसरात डॉ. आंबेडकर जयंतीनिमित्त आयोजित मिरवणूक पाहत होत्या. त्याचदरम्यान काही वेळाने घरी जाताना मोठा मुलगा सुधाकर वाटोडे याला घरासमोरील दीपक थोरात हा चाकूचा धाक दाखवून पत्नी सुशीला आणि मेहुणा अनिल बनसोडे हे मारहाण करीत होते.

दरम्यान, शोभाबाई या भांडण सोडविण्यासाठी गेल्या असता, सुशीलाबाईने वृद्धेच्या डोक्यात दगड घातला. दरम्यान मिरवणुकीच्या बंदोबस्तासाठी तैनात असलेल्या पोलिसांनी धाव घेत भांडण सोडविले. याप्रकरणी दीपक, त्याची पत्नी सुशीलाबाई आणि त्याचा मेहुणा अनिल बनसोडे विरोधात गुन्हा दाखल झाला असून पुढील तपास हवालदार अकोले करत आहेत.