Sambhaji Nagar News : संशयित काश्मिरी तरुण, महिला ताब्यात

छत्रपती संभाजीनगर : बुढीलेन परिसरात गुरुवारी (ता.२१) रात्री साडेदहाच्या सुमारास संशयित काश्मिरी तरुण व महिला भीक मागताना आढळून आले. त्यांच्यासोबत दोन लहान मुलेही होती. त्यांच्या पेहरावावरून व देहबोलीवरून ते काश्मिरी असल्याचे दिसत होते. त्यामुळे काही मुस्लिमबांधवांनी तातडीने पोलिसांना बोलावले.

घटनास्थळी पोलिस उपायुक्त नितीन बगाटे, पोलिस निरीक्षक निर्मला परदेशी आणि मोठा फौजफाटा दाखल झाला होता. ताब्यात घेत असताना काश्मिरी महिलांनी पोलिसांना प्रतिकार केला. चित्रीकरण करणाऱ्या तरुणांनाही या महिलांनी मारहाण केली. त्यानंतर पोलिसांनी व्हॅन बोलावून त्यांना ताब्यात घेतले.

पोलिसांनी त्यांना सिटी चौक ठाण्यात आणले. त्यांनी आम्ही सर्व कुपवाडा येथील असून, बसस्थानक परिसरात एका महिलेच्या घरी राहात असल्याचे आणि तिकडे कामे नसल्यामुळे आम्ही गुजरात, महाराष्ट्रात भीक मागण्यासाठी येत असल्याचे सांगितले. दरम्यान, एटीएसच्या कर्मचाऱ्यांनीदेखील सिटी चौक पोलिस ठाणे गाठून संशयितांची चौकशी केली. त्यांच्यावर प्रतिबंधात्मक कारवाई करणार असल्याची माहिती पोलिस निरीक्षक निर्मला परदेशी यांनी दिली.