दहावी-बारावीच्या परीक्षा ऑनलाइन की ऑफलाइन?

औरंगाबाद : ऑनलाईन परीक्षा व्हाव्यात यासाठी राज्यात सोमवारी ठिकठिकाणी विद्यार्थी रस्त्यावर उतरले होते. तर परीक्षा ऑफलाईनच घेण्यात याव्यात अशी मागणी देखील काही विद्यार्थी करत आहेत. त्यामुळे दहावी, बारावीच्या परीक्षा ऑनलाईन की ऑफलाईन याबाबत विद्यार्थी आमने-सामने उभे ठाकले आहे.

महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावी, बारावीच्या परीक्षेचे वेळापत्रक जाहीर करण्यात आले आहे. नियोजित वेळापत्रकानुसार परीक्षा घेण्यावर बोर्ड ठाम आहे. मात्र, दहावी आणि बारावीच्या विद्यार्थ्यांना सरकारचा हा निर्णय मान्य नाही. कारण कोरोनामुळे यंदाचे दोन महिने वगळता मुलांचे दहावी, बारावीचे वर्ग भरले नाहीत. त्यात ऑनलाइन शिक्षणाची साधने नसणाऱ्या सर्वच विद्यार्थ्यांचा बोर्डाच्या परीक्षेच्या अनुषंगाने आभ्यास झालेला नाही. असे असताना यंदा बोर्ड जर विद्यार्थ्यांची नियोजनानुसार व प्रचलित मूल्यमापन पद्धतीने परीक्षा घेणार असेल तर हे विद्यार्थ्यांसाठी अन्याय कारक होईल, असे काही विद्यार्थ्यांचे म्हणणे आहे.

तर काही विद्यार्थ्यांचे म्हणणे आहे की, घरी बसून ऑनलाइन परीक्षा घेणे म्हणजे सामुदायिक कॉपीला उत्तेजन दिल्या सारखे आहे. ऑनलाइन परीक्षा देताना विद्यार्थी मनाने पेपर सोडवतील का? यासारख्या परीक्षेतून हुशार विद्यार्थ्यांवर अन्याय होवू शकतो. वर्षात एकदाही पुस्तक सुद्धा न उघडता विद्यार्थ्यांना ऑनलाईनच्या माध्यमातून ९० ते १०० टक्के गुण मिळू शकतात. अशा परीक्षा, मूल्यमापनाला किंवा पास होण्याला भविष्यकाळात काय किंमत असेल? परीक्षा ही अभ्यास करण्याचे माध्यम आहे. परीक्षेमुळेच विद्यार्थी अभ्यास करतो. ऑनलाईन परीक्षा हे अभ्यास बंद करण्याचे माध्यम बनेल आणि विद्यार्थी निष्क्रिय बनेल. त्यामुळे त्याचा शिक्षणाकडे बघण्याचा दृष्टिकोन बदलेल. त्यामुळे परीक्षा ऑफलाईन घ्याव्यात, अशी मागणी काही विद्यार्थी करत आहेत.

''वर्षभरापासून कोरोनामुळे शाळा, कॉलेज बंद असताना बोर्डाकडून दहावी, बारावीच्या परीक्षा घेण्याचा घाट घातला जात आहे. अद्याप कोणत्याही विषयाचा आभ्यासक्रम पूर्ण झालेला नाही. त्यामुळे तिसऱ्या लाटेचा धोका लक्षात घेता परीक्षा रद्द कराव्यात अथवा पुढे ढकलण्यात याव्यात.''

- अब्दुल शेख, विद्यार्थी

''कोरोनाच्या अनुषंगाने वर्षभरापासून शाळा, कॉलेज बंद असले तरी, ऑनलाईन कधी ऑफलाईनच्या माध्यमातून वर्ग सुरु आहेत. त्यामुळे परीक्षेची तयारी पूर्ण झालेली आहे. ऑनलाईन परीक्षा म्हणजे कॉपीला प्रोत्साहान दिल्यासारखे आहे. त्यामुळे ऑफलाईन परीक्षा घेणे हितकारक आहे.''

- अविनाश बाहेती, विद्यार्थी