Ambadas Danve : पाणीटंचाईला आम्हीही जबाबदार! आम्ही शहराला दोन दिवसांआड पाणी द्यायचो

छत्रपती संभाजीनगर - महापालिकेत भाजपच्या सोबतीने शिवसेनेने वीस वर्षांपेक्षा जास्त काळ एकत्र सत्ता भोगली. तत्कालीन युतीत अंबादास दानवेही होते. सत्तेची फळे त्यांनीही चाखली. या काळापासून शहरात पाणीटंचाई सुरू झाली. नंतरच्या काळात पाणीप्रश्न संवेदनशील बनत गेला. आता गळ्याशी आल्यानंतर सर्वपक्षीयांना जाग आली..त्यात शिवसेना ‘यूबीटी’ने ‘लबाडांनो, पाणी द्या’ म्हणत आंदोलन सुरू केले. पक्षाचे नेते आणि विधान परिषदेचे विरोधी पक्षनेते अंबादास दानवे हे या आंदोलनाच्या अग्रभागी राहिले. पण, शहराला पाणीटंचाईच्या खाईत ढकलण्यास आम्हीसुद्धा जबाबदार आहोत, असा कबुलीनामा चक्क दानवे यांनी आज दिला!.दरम्यान, शिवसेना ‘यूबीटी’तील द्वितीय क्रमांकाचे नेते आदित्य ठाकरे हे १६ मे रोजी पाणीप्रश्नावर मोर्चासाठी येणार आहेत. यावेळी आंदोलनाचा समारोप केला जाणार आहे. या पार्श्वभूमीवर पक्षाच्या नेत्यानेच पाणीटंचाईवर दिलेला कबुलीनामा चमत्कारिक मानला जात आहे! अर्थात आम्ही सत्तेत होतो तेव्हा दोन दिवसांआड पाणी द्यायचो आणि भाजपने ते दहा ते पंधरा दिवसांवर नेल्याचा आरोपही त्यांनी केला..गेल्या वीस वर्षांपासून शहरवासीयांना पाणीटंचाईच्या झळा सहन कराव्या लागत आहेत. निर्ढावलेले नेते, त्यांचे चेलेचपाटे आणि महापालिकेत ‘ये-जा’ करणारे अधिकारी यांनीच शहराला पाणीकोंडीत ढकलले. बायाबापड्यांच्या डोईवरचा हंडा त्यांना दिसला नाही. याची दखल घेत ‘सकाळ’ने ‘कुठेय पाणी?’ ही वृत्तमालिका प्रसिद्ध केली..यानंतरच सर्वपक्षीय नेत्यांना जाग यायला लागली. भाजपच्या नेत्यांनी पाणीप्रश्नावर बैठका घ्यायला सुरवात केली आणि शिवसेना यूबीटीने तर ‘लबाडांनो, पाणी द्या’ रोज आंदोलन सुरू केले. अंबादास दानवे हे तर पक्षातील प्रभावी नेते. त्यांच्याकडे विधान परिषदेचे विरोधी पक्षनेतेपद आहे. एवढ्या मोठ्या घटनात्मक पदावर असूनही त्यांनी राज्याच्या सर्वोच्च सभागृहात संभाजीनगरच्या पाण्यावर एक-दोनवेळचे अपवाद वगळता ‘आव्वाज कुणाचा?’ अशी हाक दिली नाही..दुसरीकडे शहरात पाण्यावर जोरदार आंदोलन सुरू केले. आता आंदोलनाच्या समारोपाची वेळ आलेली असताना आणि समारोपाला आदित्य ठाकरे येणार असताना त्यांनी आज पत्रकार परिषद घेतली आणि शहराच्या पाणीटंचाईला आम्हीसुद्धा जबाबदार आहोतच की! अशी चक्क कबुलीच देऊन टाकली!पाच वर्षांपासून महापालिकेत प्रशासकीय कारभार सुरू आहे. अडीच वर्षांपासून भाजपची सत्ता आहे. आम्ही महापालिकेत जेव्हा सत्तेत होतो, तेव्हा शहरात दोन दिवसांआड पाणी देत होतो. आता १० ते १५ दिवसांआड पाणी मिळत आहे. त्याला भाजपच जबाबदार आहे, भाजपने काहीही केले नाही, असा आरोपही त्यांनी केला..शिवसेनेने काही केले नाही म्हणून भाजपने काही करू नये, असे नाही!शिवसेना यूबीटी पक्षातर्फे शहराच्या पाणीप्रश्नावरून ‘लबाडांनो पाणी द्या’ आंदोलन सुरू आहे. यासंदर्भात आज आयोजित पत्रकार परिषदेत दानवे म्हणाले, की तत्कालीन विरोधी पक्षनेते व विद्यमान मुख्यमंत्री देवेंद्र फडणवीस यांनी शहरात येऊन आक्रोश मोर्चा काढला होता. त्यावेळी त्यांनी सहा महिन्यांत पाणी देण्याचे आश्वासन दिले होते..पण, त्यापूर्वी आम्ही सत्तेत असताना दोन दिवसांआड पाणी देत होतो. आम्हीही शहराच्या पाणीटंचाईला जबाबदार आहोतच, पण शिवसेनेने काही केले नाही म्हणून भाजपने काही करू नये, असे नाही. खऱ्या अर्थाने भाजपच याला जबाबदार आहे.यावेळी शिवसेना उपनेत्या ज्योती ठाकरे, शुभांगी पाटील, अस्मिता गायकवाड, शीतल देवरुखकर, छाया शिंदे, सहसंपर्कप्रमुख विजयराव साळवे, उपजिल्हाप्रमुख गिरिजाराम हाळनोर, शहरप्रमुख बाळासाहेब थोरात, ज्ञानेश्वर डांगे, विधानसभा संघटक गोपाल कुलकर्णी, शहर संघटक सचिन तायडे, महिला आघाडी संपर्क संघटक सुनीता आऊलवार, सुनीता देव, अनिता मंत्री, दुर्गा भाटी, जिल्हा संघटक आशा दातार उपस्थित होते..आदित्य ठाकरेंच्या उपस्थितीत समारोप‘लबाडांनो पाणी द्या’ आंदोलनाचा समारोप १६ मे रोजी केला जाणार आहे. युवासेनाप्रमुख आदित्य ठाकरे यांच्या उपस्थितीत पैठणगेट येथून सायंकाळी चारला मोर्चा निघेल. त्यापूर्वी १३ ते १५ मेपर्यंत तीन दिवसांत उपजिल्हाप्रमुख शहरात ५६० बैठका घेतील. शुक्रवार (ता. नऊ) पासून चार दिवस हल्लाबोल आंदोलन केले जाईल, असेही दानवे यांनी यावेळी नमूद केले..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Ambadas Danve : पाणीटंचाईला आम्हीही जबाबदार! आम्ही शहराला दोन दिवसांआड पाणी द्यायचो

Related Stories