Beed Drought
esakal
नितीन चव्हाण
बीड,: शेतातलं पीक वाळून पार कोळसा झालंय... डोळ्यातलं पाणी आटलंय, पण सायेब, आमच्या पदरात अजूनही फक्त कोरडी आश्वासनंच आहेत. सांगा, लेकरा-बाळांना काय खाऊ घालू आणि दावणीच्या जनावरांना काय देऊ? हा आर्त टाहो आहे बीड जिल्ह्यातील एका हतबल शेतकऱ्याचा. हे केवळ प्रातिनिधिक शब्द नाहीत, तर आज संपूर्ण बीड जिल्ह्यातील ११ तालुक्यांमधील लाखो दुष्काळग्रस्त शेतकऱ्यांच्या काळजातील हा धगधगता आक्रोश आहे. सरकारने संपूर्ण जिल्ह्यात दुष्काळ जाहीर केला; पण आधी पंचनामे, मग अहवाल आणि नंतर मदत, या सरकारी लालफितीच्या अटींमुळे बळिराजाच्या मनात तीव्र संताप आणि हताशतेची लाट उसळली आहे. डोळ्यांदेखत पिकांची राखरांगोळी झालेली असताना आणि शेतात वाळलेली पिके सांगाड्यांसारखी उभी असताना आता मदतीसाठी कसले पंचनामे करताय? असा थेट आणि रोखठोक सवाल शेतकरी विचारत आहेत.
