Beed News : सर्जा-राजाचा साजश्रृंगाराला महागाईची झळ

जातेगाव - दीर्घ विश्रांतीनंतर जातेगाव परिसरात रिमझिम पाऊस बरसल्याने खरीप पिकांना काहीशा प्रमाणात दिलासा मिळाला आहे. मोठ्या पावसाच्या प्रतीक्षेत या भागातील शेतकरी असून, आता सर्व मदार परतीच्या पावसावर अवलंबून आहे.

रिमझिम धारांनी आजच्या परिस्थितीत शेतकरी काहीसे सुखावले आहेत. त्यातच पोळा दोन दिवसांवर येऊन ठेपला आहे. यामुळे थंड असलेल्या बाजारपेठेत चैतन्य निर्माण झाले आहे. शेतकरी बाजारात आपल्या बैलजोडीसाठी साज खरेदीला गर्दी करीत आहेत. दरम्यान मागील वर्षापेक्षा यंदा ३० ते ४० रुपयांनी साजश्रृंगाराच्या दरात वाढ झाली आहे. यंदाचा पोळा दोन दिवसांवर येऊन ठेपला आहे. यामुळे शेतकऱ्यांची सर्वत्रच लगबग दिसत आहे.

वर्षभर सोबतीने घाम गाळणाऱ्या सर्जा-राजाकरिता नवीन साज खरेदीसाठी शेतकरी बाजारात गर्दी करताना दिसून येत असून सजावट साहित्यांनी बाजारपेठ सजली आहे. म्होरकी, वेसण, कासरा, कवडीमाळ, घुंगरमाळ, लोकरी गोंडे, बाशिंग आदी साहित्यांनी बाजारात रंग भरला आहे.

मात्र, महागाईमुळे मागील वर्षीच्या तुलनेत यंदा ३० ते ४० रुपयांनी साहित्याचे यंदा दर वाढले आहेत. त्यातच पावसाने दडी मारल्याने पोळा सणावर कोरड्या दुष्काळाचे सावट घोंगावत असताना तब्बल सव्वा महिन्याच्या विश्रांतीनंतर पुन्हा रिमझिम पाऊस पडत असल्याने शेतकऱ्यांच्या खरीप पिकांना काहीशा प्रमाणात जीवदान मिळाले आहे.

बदलत्या काळानुरूप ग्रामीण भागात देखील ट्रॅक्टरसह इतर यंत्रांच्या साहाय्याने शेतीची मशागत होत असताना बैलजोडी आणि शेतीचे नाते काही शेतकऱ्यांचे आजही ठेवले असल्याचे पोळ्यानिमित्त पाहावयास मिळते. यांत्रिक पद्धतीने जरी शेती होत असली तरी दावणीला बैलजोडी असावी या भावनेतून काही शेतकरी बैलजोडी संभाळत असल्याचे चित्र आहे. दरम्यान पोळा सण गुरुवारी आहे. यामुळे जातेगाव येथील आठवडे बाजार हा बुधवारी (ता.१३) भरणार असल्याची माहिती ग्रामपंचायतीकडून देण्यात आली.

वर्षभर राबणाऱ्या सर्जा-राजासाठी महागाईची तमा न बाळगता कोणत्याही परिस्थितीत थोडेसे का होईना साजश्रॄंगार साहित्य खरेदी करून सण साजरा करणार आहे.

प्रल्हाद शिंदे, शेतकरी, सेलू.