प्रवेश फिच्या नावाखाली लुट करतांना पकडले

माजलगाव (जि. बीड) - सिध्देश्वर विद्यालयामध्ये प्रवेश घेण्याकरीता फिच्या नावाखाली लुट करत असल्याचा प्रकार उघडकीस आला असुन येथील वैष्णवी मंगल कार्यालयामध्ये आमदार प्रकाश सोळंके यांनी शिक्षणाधिकारी श्रीकांत कुलकर्णी व पोलिसांसह स्टिंग ऑपरेशन आज मंगळवारी (ता. 14) केले. यावेळी पालकांकडुन फिसच्या नावाखाली घेतेलेली एक लाख 76 हजार रूपयांची रोकड जप्त करण्यात आली आहे.

शहरामध्ये सिध्देश्वर विद्यालयामध्ये शिक्षण संस्थेत अग्रगण्य संस्था म्हणुन ओळखली जाते. याठिकाणी प्रवेश मिळविण्यासाठी अनेक पालकांची धडपड असते. शाळा सुरू होण्याच्या कालावधीत प्रवेशासाठी पालकांची गर्दी होते तर फिसच्या नावाखाली लुट होत असल्याच्या तक्रारी सामाजिक कार्यकर्त्यांनी गटशिक्षणाधिकारी कार्यालय व बीड शिक्षणाधिकारी कार्यालय यांचेकडे केलेल्या आहेत. मंगळवारी येथील वैष्णवी मंगल कार्यालयामध्ये प्रवेश घेणा-या विद्यार्थ्यांच्या पालकांना बोलावुन प्रवेशासाठी पालकांकडुन एका प्रवेशासाठी पंधरा ते विस हजार रूपये अशी फिस घेउन प्रवेश देण्यात येत होता.

याप्रकाराची तक्रार शिक्षणाधिकारी कुलकर्णी व आमदार सोळंके यांना देण्यात आली. यानंतर आमदार प्रकाश सोळंके व शिक्षणाधिकारी कुलकर्णी यांनी पोलिसांना सोबत घेत वैष्णवी मंगल कार्यालयात जात स्टिंग ऑपरेशन केले असता पालकांकडुन कर्मचा-यांमार्फत रोख रक्कम घेणे सुरू होते. यावेळी पोलिसांनी एक लाख 76 हजार रूपये रोख रक्कम जप्त केली आहे. दरम्यान याप्रकरणी पोलिसात तक्रार देण्यात आली असल्याची माहिती गटशिक्षणाधिकारी लक्ष्मण बेडसकर यांनी दिली.