पिकतंय; पण मनाजोगं विकत नाय... 

केदारखेडा (जि. जालना) -  भोकरदन तालुक्‍यातील केदारखेडा, जवखेडा ठोंबरे परिसरात अनेकांनी पारंपरिक पिकांना फाटा देत शेतीत प्रयोगशीलता जपली. फळबागांना पसंती दिली. मात्र बदलत्या हवामानाचा फटकाही फळबागांना बसत आहे. त्यातच मागणीही घटली आहे. परिणामी पिकतंय; पण विकत नाय अशी अवस्थाही अनेकांची झालेली आहे. 

केदारखेड्याच्या परिसराला गिरिजा-पूर्णा नदीचे वरदान लाभलेले आहे. नदीपात्रात पाणीसाठा चांगला असला की परिसराची भूजल पातळीही वाढते. त्यामुळे नदीकाठच्या गावांसह परिसरात अनेकांनी फळबागांची जोपासना केली. मात्र सततच्या दुष्काळामुळे अनेकांच्या फळबागा नामशेष झाल्या. दुष्काळात पदरचे पैसे खर्च करून, कर्ज काढून, उधारी-उसनवारी करून पैसे उभे करीत अनेकांनी फळबागांना टॅंकरचे पाणी दिले. त्यामुळे कशाबशा फळबागा तगल्या. मात्र आता बदलत्या हवामानाचा फळबागांना फटका बसत आहे.

हेही वाचा : ग्रामीण भागात हुडहुडी... 

जवखेडा ठोंबरे परिसरातील शेतकरी ज्ञानेश्‍वर ठोंबरे यांनी तीन ते चार एकर क्षेत्रावर पेरूची फळबाग जोपासली. गतवर्षी दुष्काळात टॅंकरने पाणी विकत घेऊन फळबाग जगवली. यंदा फळबागेत चांगल्यापैकी पेरू लगडले. प्रारंभी मागणीही चांगली राहिली. त्यामुळे भावही मिळाला. मात्र पाण्यासह फळबागेच्या जोपासनेसाठी केलेला खर्च पाहता फारसे काही हाती लागले नाही.

हेही वाचा : नवीन वर्षात तरी बदनापूर बसस्थानक होईल का?

सध्याही फळबागेत पेरू लगडलेले आहेत. मात्र सतत येणारे आभाळ, धुके, थंडी यामुळे पेरूच्या फळांवरही परिणाम झाला. शिवाय मागणीही कमी झाली. त्यामुळे कमी भावात पेरूची विक्री त्यांना करावी लागत आहे. 

दुष्काळात विकतचे पाणी आणून फळबाग जगविली. यंदा बागेत फळे बऱ्यापैकी लगडली. सुरवातीला विक्रीही झाली. नंतर मात्र मागणीही घटली आणि भावही कमी मिळत आहे. मिळेल त्या भावात फळविक्री करावी लागत आहे. त्यातच बदलत्या वातावरणाचा फटका बसण्याची शक्‍यता वाटते. 
- ज्ञानेश्वर ठोंबरे, शेतकरी