मुख्यमंत्री उद्धव ठाकरेंचा उद्याचा उस्मानाबाद दौरा रद्द, बुधवारी अतिवृष्टीग्रस्त भागाची करणार पाहणी

उस्मानाबाद  : अतिवृष्टीग्रस्त भागांच्या पाहणीसाठी मुख्यमंत्री उद्धव ठाकरे हे मंगळवारी (ता.२०) उस्मानाबादच्या दौऱ्यावर येणार होते. मात्र सदरील दौरा रद्द करण्यात आला आहे. त्याऐवजी बुधवारी (ता.२१) मुख्यमंत्री उद्धव ठाकरे दौऱ्यावर येणार असल्याचे मुख्यमंत्री कार्यालयाकडून कळविण्यात आले आहे.
अतिवृष्टीमुळे झालेल्या नुकसानीची पाहणी करण्यासाठी मुख्यमंत्री उद्धव ठाकरे बुधवार उस्मानाबाद जिल्ह्याचा दौरा करणार आहेत.

शरद पवार कृषी विधेयकावर बोलले; मालाच्या किंमतीची गॅरंटी नाही, त्यामुळे शेतकऱ्यांचा विरोध

यात ते जिल्ह्यातील अतिवृष्टीग्रस्त भागाला भेट देणार असुन प्रत्यक्ष शेतकरी, ग्रामस्थ यांच्याशी संवाद साधणार आहेत. सकाळी साडेनऊ वाजता सोलापूर शासकीय विश्रामगृह येथून मोटारीनेने काटगावकडे (ता. तुळजापूर) प्रयाण, सकाळी सव्वा दहा वाजता काटगाव येथे आगमन होणार आहे. तेथील अतिवृष्टीमुळे पडझड झालेल्या घरांची पाहणी व शेती पिकांच्या नुकसानीची पाहणी करुन सव्वा दहा वाजता काटगाव येथून तुळजापूरमार्गे अपसिंगा (ता. तुळजापूरकडे) प्रयाण, तर सव्वा अकरा वाजता अपसिंगा येथे आगमन व अतिवृष्टीमुळे घरांची पडझड व शेती पिकांच्या नुकसानीची पाहणी करण्यात येईल.

साडेअकराच्या जवळपास अपसिंगा येथून तुळजापूर शासकीय विश्रामगृहाकडे प्रयाण करतील. शासकीय विश्रामगृह येथे दुपारी साडेबारा वाजता पूर परिस्थितीबाबत अधिकाऱ्यांशी चर्चा व अभ्यागतांच्या भेटी घेण्यात येणार आहे. दुपारी एक ते पावणेदोन वाजेपर्यंत मुख्यमंत्री यांनी वेळ राखीव ठेवली आहे. पावणदोन वाजता शासकीय विश्रामगृह तुळजापूर येथून सोलापूर शासकीय विश्रामगृहाकडे रवाना होणार असून साडेतीन वाजता सोलापूर येथून विमानाने मुंबईकडे रवाना होणार आहेत.

संपादन - गणेश पिटेकर