कोरोनाच्या भीतीने वसमत तालुक्‍यात नागरिकांचा परतीचा प्रवास 

वसमत ः शहर व तालुक्‍यात आतापर्यंत विविध राज्यातून दोन हजार २७ नागरिक आले असून त्‍यात काही विद्यार्थ्यांचा समावेश आहे. ते सर्वजन आपआपल्या घरी आल्याची माहिती उपविभागीय अधिकारी प्रवीण फुलारी यांनी दिली.

वसमत शहर व तालुक्‍यात कामानिमित्त कर्नाटक, नागपूर, पुणे, रायगड, मुंबई, नाशिक, हैदराबाद येथे गेलेले नागरिक त्‍याच्या घरी आले असून यात विद्यार्थ्यांचादेखील समावेश आहे. मात्र, या नागरिकांकडे संशयाने बघितले जात आहे. यातील २५ ते २६ जणांना सर्दी, खोकला आहे. मात्र, त्‍याबाबत घाबरण्याचे काही कारण नाही. ते आरोग्य विभागाच्या निगराणीखाली आहेत. 

हेही वाचा - कोरोना’च्या भीतीने नांदापूर गावची वेस युवकांनी केली बंद

नागरिकांनीदेखील स्‍वतः जावून तपासणी करावी
प्रत्‍येक गावात ग्रामपंचायत प्रशासन, पोलिस पाटील यांनादेखील सूचना देण्यात आल्या आहेत. बाहेरगावांतून कोणी आले असेल तर त्‍यांनी आरोग्य तपासणी करून घ्यावे, असे त्‍यांना सांगण्यात आले आहे. नागरिकांनीदेखील स्‍वतः जावून तपासणी करावी. आतापर्यंत तपासणी केलेल्या सर्वाचे रिपोट निगेटिव्ह असल्याची माहिती श्री. फुलारी यांनी दिली. 

हेही वाचा - दवंडीच्या माध्यमातून गावांमध्ये ‘कोरोना’ची जनजागृती

शेवाळा येथे शंभर गावकरी आलेत बाहेरगावांतून
शेवाळा ः कळमनुरी तालुक्‍यातील शेवाळा येथील अनेक गावकरी कामानिमित्त पुणे, मुंबई आदी शहरांत गेले होते. ते आता गावात परतले असून यात शंभर गावकऱ्यांचा समावेश आहे. त्‍यांची नोंदणी आशा वर्कर यांनी केली. मात्र, त्‍यांच्या तपासणी केली नसल्याचे गावकरी सांगत आहेत.
‘कोरोना’ या विषाणुजन्य रोगाचा प्रसार होऊ नये म्हणून शासनाने देशात आपत्ती निवारण कायदा लागू केला असून आरोग्य विभागाला गावात बाहेरून आलेल्यांची तपासणी करण्याचे सक्त आदेशही दिले आहेत. शेवाळा ग्रामपंचायतीकडून गावात जनजागृती केली जात आहे. मात्र, शेवाळा येथील आरोग्य उपकेंद्राचे वैद्यकीय अधिकारी श्रीमती डॉ. माने यांना विचारले असता त्या म्हणतात की, आशा वर्कर यांनी त्यांची नोंदणी केली आहे. शेवाळा येथील जवळपास शंभर नागरिक मुंबई, पुणे, औरंगाबाद, आंध्रप्रदेश आदी ठिकाणी कामासाठी गेले असून ते सध्या गावांत आल्याचे सरपंच अभय सावंत व ग्रामविकास अधिकारी पी. डी. जाधव यांनी सांगितले.

बाहेरगावाहून आलेल्यांची तपासणी करावी
शेवाळा येथील जवळपास १०० नागरिक मुंबई, पुणे, औरंगाबाद, आंध्रप्रदेश आदी ठिकाणी कामाला गेले होते. ते शेवाळा गावात परत आले आहेत. त्यांची तपासणी करण्यात यावी, अशी सूचना वैद्यकीय अधिकाऱ्यांना दिल्या आहेत. - अभय सावंत, सरपंच.