Ajit Pawar : भावी मुख्यमंत्री म्हणून अजित पवारांचे झळकले बॅनर, सोबत मुंडे जयंत पाटलांचेही फोटो

परळी वैजनाथ - शहरातील तळ (नेहरु चौक) परिसरात राष्ट्रवादी काँग्रेसच्या माजी नगरसेवकाने, अजित पवार भावी मुख्यमंत्री असा मजकूर असलेले बॅनर लावले. दरम्यान याची शहरात चर्चा होताच तासाभरात बॅनर काढण्यात आले.

राष्ट्रवादी काँग्रेसचे अध्यक्ष शरद पवार यांनी पुस्तक प्रकाशनाच्या कार्यक्रमात आपण पक्षाच्या अध्यक्षपदाच्या जबाबदारीतून मुक्त होणार अशी घोषणा केली. यामुळे राज्यात खळबळ उडाली. दरम्यान शहरात राष्ट्रवादी काँग्रेसचे माजी नगरसेवक जाबेरखान पठाण यांनी अजित पवार यांचे भावी मुख्यमंत्री म्हणून बॅनर लावले.

या बॅनरवर शरद पवार, सुप्रिया सुळे, प्रदेशाध्यक्ष जयंत पाटील, आमदार धनंजय मुंडे, वाल्मीक कराड यांच्यासह माजी नगरसेवक जाबेरखान पठाण यांचे छायाचित्र होते. बॅनर लावताच याची सोशलमीडियावर चर्चा सुरू झाली. यामुळे तासाभराने बॅनर काढण्यात आले.