कोरोना : आता दमरेचाही कोरोनाविरुध्द लढा 

नांदेड : दक्षिण मध्य रेल्वेने कोरोना व्हायरसचा प्रसार रोखण्याकरिता विविध उपाय योजना केल्या आहेत. या अंतर्गत सोमवारी (ता. १६) मार्च रोजी महाव्यवस्थापक गजानन माल्या यांनी दक्षिण मध्य रेल्वे मधील सर्व डीआरएम. तसेच विविध स्तरावरील वैद्यकीय अधिकारी आणि कर्मचारी यांची बैठक घेवून विविध योजनांची माहिती दिली. तसेच व्हिडीयो कॉन्फर्सिंगद्वारे वैद्यकीय अधिकारी आणि कर्मचारी यांना आरोग्य मंत्रालय आणि रेल्वे बोर्डातील उच्च वैद्यकीय विशेषज्ञ मार्फत या रोगाचा प्रसार रोखण्याकरिता करावयाच्या कार्यवाही बाबत प्रशिक्षण देण्यात आले.
  
दक्षिण मध्य रेल्वेच्या नांदेड, हैदराबाद, सिकंदराबाद, विजयवाडा, गुंटूर आणि गुंटकळ या सहा  विभागातील २७ ठिकाणी कोरोनागृस्तांना ठेवण्याकरिता १०१९ बेड्सची व्यवस्था करण्यात आली आहे. तसेच रेल्वे विभागातील वैद्यकीय अधिकारी संबधित राज्य सरकारच्या आरोग्य विभागाशी संपर्क ठेवून आहेत. जेणेकरून या विषाणूच्या प्रसार रोखता येईल.

हेही वाचा - कोरोना सावट : सामाजिक बांधिलकी जोपासत विवाह स्थगीत

या शिवाय रेल्वे प्रसाशानातर्फे उपाययोजना
  
दक्षिण मध्य रेल्वेमधील सर्व मुख्य रेल्वे गाड्या आणि मुख्य रेल्वे स्थानकावर या व्हायरसचा प्रसार रोखण्याकरिता रेल्वेस्थानकावरील बेंचेस, सीट्स, प्लाटफॉर्म सरफेस, रेलिंग, लिफ्ट्स, एस्केलेटर्स, एस्केलेटर्स हेंडल आणि तिकीट खिडकी समोरील दांडे, स्वच्छता गृहाचे दरवाजे, हेंडल, इत्यादी स्वच्छ/निर्जंतुक  केले जात आहेत. तसेच रेल्वे डब्यांमध्येही स्वच्छता/निर्जंतुकीकरण  केली जात आहे.  रेल्वे स्थानकावरील आणि रेल्वे गाड्यामधील प्रसाधन गृहामध्ये, तसेच बेसिनमध्ये लिक्विड सोप आणि साबणची व्यवस्था करण्यात आली आहे. रेल्वे गाड्यांमध्ये काम करत असलेले ओ.बी.एच.एस. कर्मचाऱ्यांना रेल्वे डब्यांमध्ये व्यवस्थीत स्वच्छता ठेवण्यास सांगितलं आहे. 

येथे क्लिक करा - ‘काेरोना’चा प्रभाव : बाजारपेठ गडगडली !

१५ एप्रिलपर्यंत वातानुकुलीत डब्यांचे तापमान २५ डिग्रीपर्यंत 

वातानुकुलीत डब्यांमधील पडदे तत्काळ प्रभावाने काढण्यात आले आहेत. या स्वच्छता/निर्जंतुकीकरण   सोबतच खबरदारीचा उपाय म्हणून रेल्वे मधील वातानुकुलीत डब्यांत देण्यात येणाऱ्या वुलन ब्लांकेट (लोकरीची चादर) रेल्वे प्रवाशांना ता. १५ एप्रिलपर्यंत त्यांनी मागितल्या तरच देण्याचे ठरविण्यात आले आहे. ते वुलन ब्लांकेट घरून आणू शकतात. या बद्दल वातानुकुलीत श्रेणीतील रेल्वे प्रवाशांना एस.एम.एसद्वारे कळविण्यात आले आहे. वातानुकुलीत डब्यांमध्ये बेड शिट्स, पिलो कव्हर आणि नेपकिन या प्रवाशांना पूर्वीप्रमाणेच देण्यात येतील. तसेच ता. १५ एप्रिलपर्यंत वातानुकुलीत डब्यांचे तापमान २५ डिग्रीपर्यंत ठेवण्याचे आदेश संबंधितास देण्यात आले आहेत.

प्रवाशांना आवाहन

प्रवाशांनीही कोरोना व्हायरसचा प्रसार रोखण्याकरिता रेल्वे प्रशासन करत असलेल्या प्रयत्नास सहकार्य करावे तसेच रेल्वे गाड्यांमध्ये स्वच्छता पाळावी असे आवाहन रेल्वे प्रशासनातर्फे करण्यात येत आहे.