लातूर कोरोना अपडेट : त्या १२ जणांच्या संपर्कात आलेल्यांचा शोध सुरू

सुशांत सांगवे
Saturday, 4 April 2020

पालकमंत्र्यांची माहिती; हरियाणा ते लातूरपर्यंतच्या प्रवासात ‘ते’ कोणाकोणाच्या संपर्कात आले याचा शोध

लातूर : निलंगा येथे आढळून आलेले कोरोना पॉझिटिव्ह रूग्ण निलंग्यात कोणाकोणाच्या संपर्कात आले, त्याचप्रमाणे त्यांच्या हरियाणा ते लातूरपर्यंतच्या प्रवासात ते कुठे  आणि कुणाकुणाच्या संपर्कात आले याचा शोध घेण्याचे काम राज्य सरकारतर्फे सुरू आहे, अशी माहिती पालकमंत्री अमित देशमुख यांनी दिली. कोणत्याही परिस्थितीत याची कुणालाही लागण होणार नाही, याची काळजी प्रशासनाने घ्यावी, असेही ते म्हणाले.

लातूर जिल्ह्यात एकाचवेळी ८ कोरोना पॉझिटिव्ह रूग्ण आढळून आल्याने अनेकांना धक्का बसला आहे. अनेकांची काळजी वाढली आहे. या पार्श्वभूमीवर देशमुख यांनी  हे आठही कोरोना पॉझिटिव्ह रूग्ण कोणाकोणाच्या संपर्कात आले याचा शोध घेतला जात आहे, असे सांगितले. 

ते म्हणाले,  हरियाणा राज्यातील नुह जिल्ह्यातील फिरोजपुर झिरका येथे गेल्या तीन महिन्यापासून धार्मिक कार्यासाठी वास्तव्यास असलेले बारा यात्रेकरू २ एप्रिलच्या मध्यरात्री  लातूर जिल्ह्यातील  निलंगा येथील एका धार्मिक स्थळी आढळून आले. या बारा जणांचे स्वॅब तपासणीसाठी पुणे येथे पाठवले असता त्यातील आठ जणांना कोरोना पॉझिटिव्ह  असल्याचे स्पष्ट झाले आहे. या कोरोना पॉझिटिव्ह रुग्णांवर लातूर येथील विलासराव देशमुख शासकीय वैद्यकीय संशोधन संस्थेच्या महाविद्यालय रुग्णालयात उपचार करण्यात येत असून त्यांची प्रकृती स्थिर आहे.  

क्लिक करा - लातूर जिल्हा हादरलाच या बातमीने 

अन्य चार जणांना अलगीकरण कक्षात ठेवण्यात येत आहे. जिल्हा प्रशासन याबाबत सविस्तर माहिती घेत आहे.  या सर्व  यात्रेकरूंवर तसेच अलगीकरण केंद्रात ठेवण्यात आलेल्या यात्रेकरूंवर उपचार करताना  पुरेशी काळजी घेण्यात यावी  आणि कोणत्याही परिस्थितीत  याची कुणालाही लागण होणार नाही , याबाबत  दक्षता घेण्याचे आणि या सर्वांवर उपचार करून लॉकडाऊननंतर त्यांच्या मूळ गावी पाठविण्याचे निर्देश  संबंधित यंत्रणेला दिले आहेत, असे देशमुख यांनी सांगितले.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Coronavirus Patient In Latur Nilanga Health News