माझे नाव एवढे घेतले जाते की २४ तासांपैकी २ तास उचक्या लागतात

बीड : आज भाऊबीज आहे. हा दिवस म्हणजे भाऊ आणि बहिणींच्या पवित्र नात्याचे प्रतीक. मात्र, आजही मुंडे भाऊ-बहिणीमध्ये बाद पाहायला मिळाला. दिवसातील चोवीस तासांपैकी दोन तास मला नुसत्या उचक्या येतात. मात्र, एवढ्या मोठ्या टीकेचा मी धनी झाला आहे, असे धनंजय मुंडे पंकजा मुंडे यांचे नाव न घेता म्हणाले.

शनिवारी भाऊ बिजेच्या दिवशी परळी येथे कार्यक्रम आयोजित करण्यात आला होता. या कार्यक्रमाला धनंजय मुंडे यांची प्रामुख्याने उपस्थिती होती. कार्यक्रमात बोलताना त्यांनी कोणाचेही नाव न घेता भाजपसहित पंकजा मुंडे यांच्यावर टीका केली. भाजपने पाच वर्ष सत्ता उपभोगली. मात्र, या पाच वर्षांच्या काळात त्यांना पाहिजे तशी कामे करता आली नाही.

भाजपने पाच वर्ष सत्ता उपभोगली तरीही परळी-अंबाजोगाई रस्त्याचे काम केले नाही. तो रस्ता आम्ही अवघ्या दीड वर्षात पूर्ण केला. यामुळे विरोधकांच्या ते पचनी पळत नाही आहे. यामुळेच ते उलट सुलट आरोप करीत फिरत आहे, असे धनंजय मुंडे यांनी माजी मंत्री पंकजा मुंडे यांचे नाव न घेता टोला लगावला आहे.

आपल्या मातीतल्या माणसाची काळजी लागते. मागच्या पाच वर्षांच्या काळात जो परळी-अंबाजोगाई रस्ता करता आला नाही, तो रस्ता आम्ही अवघ्या दीड वर्षात पूर्ण केला. यामुळेच दिवसाच्या चोवीस तासांपैकी दोन तास मला उचक्या लागतात. सध्या मी एवढ्या मोठ्या टीकेचा धनी झालो आहे, असेही ते म्हणाले.

माझे नावच घेतले जाते

मी ध्येय वेडा माणूस आहे. परळीमध्ये मोठ-मोठे उद्योग आले पाहिजेत, याचे मी स्वप्न पाहिले आहे. परळीकडे असंख्य लोकांनी वाटा वळवल्या पाहिजेत. अशी परळी मला निर्माण करायची आहे. भुयारी गटाराचे एवढे मोठे काम चालू आहे. विकास कामांमुळे दिवसातल्या २४ तासांपैकी दोन तास उचक्या लागत असतात. एवढे माझे नाव घेतले जाते, असेही धनंजय मुंडे म्हणाले.

परळीचा चेहरा पूर्ण बदलणार

दिवसातून चार तास जरी उचक्या लागल्या तरी मी घाबरणार नाही. कारण, विकासकामे करताना थोडा वेळ तर लागणारच आहे. मी परळीचा चेहरा पूर्ण बदलणार आहे. तुम्ही जनतेने माझ्यावर प्रेम व विश्वास ठेवला, तसाच पुढे ठेवाल अशी अपेक्षा आहे. काही जण मला दोन वर्षांच्या कामाचा हिशोब मागत आहेत. त्यांना पण मी हिशेब देणारच आहे, अस म्हणत त्यांनी मुंडे भगिनींवर निशाणा साधला.