हिंगोली जिल्ह्यात वाढत्या कोरोना रुग्ण संख्येमुळे कॉन्टॅक्ट ट्रेसींग, चाचण्यावर भर द्या, जिल्हाधिकारी यांचे आदेश

हिंगोली : जिल्ह्यात कोरोना बाधित रुग्णांमध्ये दिवसेंदिवस वाढ होत असल्याने कोरोनाचा प्रादुर्भाव वाढू नये म्हणून कॉन्टॅक्ट ट्रेसींग करणे, कोरोना चाचण्या वाढविणे, कटोन्मेंट झोन करुन कार्यवाही करणे, बसस्थानक तसेच रेल्वे स्थानकावर येणाऱ्या प्रवाशांची तपासणी करण्याचे आदेश जिल्हाधिकारी रुचेश जयवंशी यांनी संबंधीताना दिले आहेत.

जिल्ह्यात दिवसेंदिवस कोरोनाचा वाढता प्रादुर्भाव लक्षात घेता जिल्हाधिकारी रुचेश जयवंशी यांनी जिल्ह्यात कोरोनाच्या अनुषंगाने होणाऱ्या तपासण्या व उपाययोजना करण्यासाठी आदेश दिले आहेत. जिल्ह्यात कोरोना रुग्ण आढळून आल्यास कंटोन्मेंट झोनमधील सर्व नागरिकांची कोरोना चाचणी अनिवार्य करण्यात यावी. आरटीपीसीआर चाचणी करण्यात यावी व लक्षणे नसलेल्या नागरिकांची कोरोना अँटीजेन चाचणी करण्यात करण्यात यावी. जिल्ह्यातील शासकीय रुग्णालयामधील बाह्यरुग्ण आदेशानुसार विभागामध्ये येणाऱ्या रुग्णांची अनिवार्यपणे कोरोना चाचण्या करावी, कॉन्टॅक्ट ट्रेसींग प्रक्रिया प्रभावीपणे राबविण्यासाठी तहसीलदारांनी तालुका पातळीवर कॉन्टॅक्ट ट्रेसींग पथक नेमावे. या पथकाने आरोग्य विभाग व तहसीलदारांच्या आदेशानुसार कॉन्टॅक्ट ट्रेसींग करण्याच्या अनुषंगाने कार्यवाही करावी. 

हेही वाचा - मोजके कर्मचारी आणि पुजारी यांच्या उपस्थितीत प्रभू नागनाथचा रथोत्सव साजरा

कॉन्टॅक ट्रेसींग करण्यात आलेल्या सर्व नागरिकांना  शासकीय विलगीकरण केंद्रात विलगीकरण करण्यात यावे विलगीकरण केंद्रातील सर्व सोयी सुविधा करण्यासाठी तहसीलदारांमार्फत नियोजन करावे. तसेच आवश्यकतेनुसार सोयी सुविधांसाठी तहसीलदारांनी स्थानिक प्रशासनाचे सहकार्य घ्यावे, आरोग्य विभागामार्फत बस व रेल्वे स्थानकावर येणाऱ्या नागरिकांची कोरोना चाचणी अनिवार्य करण्यात यावी. कोरोना रुग्ण आढल्यास उपचाराच्या अनुषंगाने कार्यवाही करण्यात यावी. यानुसार जबाबदारी निश्चित करण्यात आलेल्या संबंधित अधिकारी यांनी कार्यवाही करण्यास सुरुवात करावी असे आदेश दिले आहेत. आदेशाची आवज्ञा करणाऱ्यावर भारतीय संहितेनुसार संबंधितावर कारवाई करण्यात येईल , याची नोंद घ्यावी असे आदेशात नमूद केले आहे.

संपादन- प्रल्हाद कांबळे