Ambad News : शेतकरी पती, पत्नीने विषारी औषध प्राशन करून संपविली जीवनयात्रा

अंबड, जि. जालना - अंबड तालुक्यातील बनटाकळी येथील अल्पभूधारक शेतकरी अशोक नाना कानकाटे (वय-44) वर्षे व त्यांची पत्नी संगीता अशोक कानकाटे (वय-40) वर्षे यांनी बुधवारी (ता. 20) सकाळी गावशिवारातील शेतात विषारी औषध प्राशन करून दोघांनी आत्महत्या करत आपली जीवनयात्रा संपविली आहे.

याबाबत सविस्तर माहिती अशी की, त्यांच्या वडिलांची तीन एकर शेती त्यांना दोन मुले यामुळे शेजमिनीची वाटणी केल्यानंतर अशोक कानकाटे याला एक एकर तर त्यांचा दुसरा भाऊ यांना एक एकर व वडिलांकडे एक एकर जमीन अशा वाटण्या झालेल्या होत्या. दोन्ही मुले व वडील वेगवेगळे राहत होते. मात्र अशोक कानकाटे यांना दोन मुली, एक मुलगा असा परिवार आहे.

मोठया मुलीचे लग्न झाले. लहान मुलगी इयत्ता सहावी मध्ये शिकत आहे. तर मुलगा बारावी पास होऊन रोजगाराच्या शोधात मुंबई येथे गेलेला होता. अशोक कानकाटे व त्यांची पत्नी संगीता हे नेहमीच अर्थिक विवंचनेत होते. त्यांचाकडे खाजगी, बँकेचे बचत गटाचे कर्ज यामुळे अर्थिक अडचणीत सापडलेले होते.

याचबरोबर शेतात पाण्याअभावी मोसंबीची झाडे जळून चालली होती. सततचा दुष्काळ, घरची अर्थिक परिस्थीती बेताची असल्याने नेहमीच अर्थिक विवंचना,कर्जबाजारी पणामुळे आपली अखेर जीवनयात्रा संपवल्याचे नातेवाईक, मित्रमंडळीतून ऐकायला मिळते.

बनटाकळी शेतशिवारात बुधवारी सकाळी आठ वाजता शेतात जाणाऱ्या शेतकरी यांना अशोक व त्यांची पत्नी संगीता पडलेले दिसले.याची माहिती गावातली त्यांच्या नातेवाईक व ग्रामस्थांना मिळताच सर्वांनी एकच धावपळ केली. त्यानंतर अंबड पोलिसांना या बाबत माहिती देण्यात आली.

अंबड पोलिस ठाण्याचे पोलिस उपनिरिक्षक जॉन स्कॉट,पोलिस हेड कॉन्स्टेबल प्रताप चव्हाण यांनी घटनास्थळी जावून ग्रामस्था समक्ष पंचनामा केला. नातेवाईक, ग्रामस्थांच्या मदतीने त्यांना अंबड येथील उपजिल्हा रुग्णालयात दाखल करण्यात आले होते. डॉ. केंद्रेकर यांनी तपासून मृत घोषित केले. अंबड पोलिस ठाण्यात अकस्मात मृत्यूची नोंद करण्यात आली आहे.

या घटनेचा तपास पोलीस हेड कॉन्स्टेबल प्रताप चव्हाण हे करत आहे. अशी माहिती ठाणे अंमलदार सेना यांनी दिली आहे. शोकाकुल वातावरणात रात्री उशिरा आत्महत्याग्रस्त शेतकरी यांच्यावर बनटाकळी येथे अंत्यसंस्कार करण्यात आले. या दुर्दैवी घटनेने परीसरात हळहळ व्यक्त करण्यात येत आहे.