सार्वजनिक स्थळी थुंकल्यास हजार रुपये दंड 

जालना - कोरोना विषाणूचा प्रसार रोखण्यासाठी सार्वजनिक ठिकाणी थुंकणे, सोशल डिस्टन्सिंगचे पालन न करणे, मास्कचा वापर न करणाऱ्यांवर स्थानिक स्वराज्य संस्थांमार्फत दंडात्मक कार्यवाही करण्याचे आदेश जिल्हाधिकारी रवींद्र बिनवडे यांनी जारी केले आहेत. 

सार्वजनिक स्थळी रस्ते, बाजार, रुग्णालय, कार्यालय आदी ठिकाणी थुंकल्याचे प्रथम आढळल्यास १ हजार रुपये दंडाची शिक्षा होणार आहे. सार्वजनिक स्थळी चेहऱ्यावर मास्क न वापरणे, नाक व तोंड सुरक्षितपणे पूर्ण झाकलेले नसल्यास ५०० रुपये दंड होणार आहे.

हेही वाचा :  लॉकडाऊनमध्ये मजुरांच्या हाताला मिळणार काम

दुकानावर, फळ, भाजीपाला विक्रेते, सर्व जीवनावश्यक वस्तू विक्रेते व ग्राहक यांनी सोशल डिस्टन्सिंगचे पालन न करणे, दोन ग्राहकांमध्ये कमीत कमी तीन फूट अंतर न राखणे, विक्रेत्यांनी मार्किंग न करणे यासाठी २०० रुपये, तर आस्थापना मालक, दुकानदार, विक्रेता यांना २ हजार रुपये दंड आकारला जाणार आहे. सार्वजनिक स्थळी रस्ते, बाजार, रुग्णालय, कार्यालय आदी ठिकाणी एखादी व्यक्ती विनाकारण आढळून आल्यास १ हजार रुपये दंड, एखादी व्यक्ती दुचाकीवरून वैयक्तिक वापरासाठीचा भाजीपाला, किराणा, औषधी घेऊन जात असल्याची बतावणी करून अनावश्यक फिरत असल्यास १०० रुपये दंड आकारले जाणार आहेत. 

हेही वाचा : पोलिसांच्या सुदृढ आरोग्यासाठी अष्टसूत्री

हे दंड प्रथम गैरकृत्य करताना आढळल्यास करण्यात येईल; मात्र दुसऱ्यांदा गैरकृत्य करताना आढळल्यास फौजदारी कार्यवाही करण्यात येईल, असे जिल्हाधिकारी रवींद्र बिनवडे यांनी एका आदेशाद्वारे कळविले आहे.