Jalna : जालन्यात अपघातात पाच जण जागीच ठार : मृतात दोन लहान मुलांचा समावेश

भोकरदन : भोकरदन जाफ्राबाद मुख्य मार्गावर प्रवासी ऑटोरिक्षा व आयशर वाहनाच्या समोरा-समोर झालेल्या भिषण अपघातात पाच जण जागीच ठार झाले. मृतात दोन बालकांसह एक महिला व दोन पुरुषांचा समावेश असून, एक मुलगा व एक पुरुष या अपघातात गंभीर जखमी झाल्याने त्यांना जालना येथे उपचारासाठी हलविण्यात आले आहे.

ही घटना सोमवारी दुपारी साडेतीन वाजेच्या सुमारास घडली असून, वरील अपघातातील सर्व मृत व जखमी हे एकाच कुटूंबातील व बुलडाणा जिल्ह्यातील देऊळगाव राजा येथील असल्याची प्राथमिक माहिती समोर येत आहे.

मिळालेल्या माहितीनुसार भोकरदनकडून जाफ्राबादकडे जाणाऱ्या प्रवासी ऑटोरिक्षा जाफ्राबादकडून भोकरदनकडे येणाऱ्या भरधाव आयशरने माहोरा गावाजवळील कापूस जिनिंगशेजारी असलेल्या शिवम धाब्याजवळ जोरदार धडक दिली.

ही धडक एवढी भिषण होती की, या अपघातात ऑटोरिक्षा मधील सात पैकी पाच जणांचा जागीच मृत्यू झाला. तर दोन जण गंभीर जखमी झाले असून, त्यांच्यावर माहोरा येथील प्राथमिक आरोग्य केंद्रात उपचार करून जालना येथे हलविण्यात आले असल्याचे सांगण्यात आले आहे.

विशेष म्हणजे या अपघातातील सर्व मयत व जखमी हे एकाच कुटूंब असून, ते एका कार्यक्रमानिमित्त एकत्रित ऑटोरिक्षाने गेल्याचे सांगण्यात येत आहे. मयत व जखमींची नावे समजली नसली तरी ते बुलडाणा जिल्ह्यातील देऊळगाव राजा येथील असल्याची प्राथमिक माहिती समोर येत आहे. अपघातात रिक्षाचा पूर्णपणे चुराडा झाला