अन् नदीपात्रातला हा थरार...

पूर्णा (जि.परभणी) : चोरट्या मार्गाने गोदावरी पात्रातील वाळू उपश्यासाठी वापरण्यात येणारे चार लोखंडी टोकरे महसूल व पोलिसांच्या पथकाने जप्त केले होते. सदरील जप्त केलेले टोकरे पळवून नेण्याच्या प्रयत्न चुडावा पोलिसांनी शुक्रवारी (ता.१७) हाणून पाडला. जीव धोक्यात घालून या कार्यवाहीत सहा लाख रुपयांचे चार टोकरे जप्त केली. या वेळी चारही आरोपी पाण्यात उडी मारुन फरार झाले. या प्रकरणी चुडावा पोलिस ठाण्यात चार आरोपी विरूध्द शनिवार (ता.१८) गुन्हा दाखल करण्यात आला आहे.

कोरोनाचा संसर्ग वाढु नये म्हणून पोलिस, तहसिल, कृषी, नगरपालिका, सरपंच, पोलिस पाटील सर्व प्रशासकीय यंत्रणा अहोरात्र परीश्रम घेत आहेत. मात्र, काही जण आपल्या भविष्याच्या उपजीविकेसाठी चोरट्या मार्गाने गोदावरी पात्रातील वाळू उपसासाठी वापरात येणारे जप्त केलेले चार टोकरे पळवून नेण्याच्या प्रयत्न करत आहेत.

हेही वाचा व पहा - Video: चक्क बैलांना दोडक्याची वैरण !

धानोरा मोत्या (ता.पूर्णा, जि.परभणी) शिवारातील नदी पात्रात पोलिस व महसूलच्या पथकाने जप्त केलेले चार लोखंडी टोकरे नदी पात्रा जवळ आणून लावले होते. दरम्यान, शुक्रवारी दुपारी कर्मचाऱ्यांच्या ताब्यातील टोकरे पळून नेण्याचा चार आरोपींनी प्रयत्न केला. या वेळी चुडावा पोलिस ठाण्यातील सहायक पोलिस निरिक्षक शिवाजी देवकते यांनी स्वतः नदी पात्रात जाऊन आरोपींचा पाठलाग करून ते टोकरे ताब्यात घेतले. 

आरोपींचे आधारकार्ड पोलिसांच्या हाती
या घटनेत असणारे आरोपी हे नदीत उड्या टाकून फरार झाले असले तरी, त्या पैकी एका आरोपीचा मोबाईल व आधारकार्ड पोलिसांच्या हाती लागले आहे. महसूल कर्मचारी आर. आर. सरोदे, अभिजित पाटील, तलाठी मावरे यासह चुडावा पोलिस जमादार रमाकांत तोटेवार, दीपक मुदिराज, सुधीर काळे, मोहन महामुने, अशोक कांबळे यांनी महत्वाची भूमिकां बजावली. 

हेही वाचा - एक हजार ३१ वाहनांवर पोलिसांची कारवाई ​

टोकरे महसुलच्या ताब्यात
ताब्यात घेतलेल्या चारही लोखंडी टोकरे जप्त केली असून त्यांची बाजारभाव अंदाजे किंमत सहा लाख रुपये एवढी आहे. या प्रकरणी चुडावा पोलिस ठाण्यात चार आरोपी विरूध्द शनिवार (ता.१८) गुन्हा दाखल करण्यात आला आहे. चारही आरोपी पाण्यात उडी मारून फरार झाले आहेत. सदरील टोकरे महसुल कर्मचाऱ्याच्या ताब्यात दिले.