मंठ्यात गटविकास अधिकाऱ्यांना मारहाण; चौघांविरुद्ध गुन्हा दाखल

मंठा (जालना): येथील पंचायत समितीचे गट विकास अधिकारी मच्छिंद्रनाथ धस यांना बिलाचे पैसै मला परत करा म्हणत चौघांनी बेदम मारहाण केली. या प्रकरणी संशयित उद्धव रामभाऊ पवार आणि इतर तीन जण अशा चौघांविरोधात गुन्हा दाखल करण्यात आला आहे. ही घटना गुरुवारी ( ता. पाच ) दुपारी बारा वाजेच्या सुमारास पंचायत समिती कार्यालयात घडली आहे.

पंचायत समिती कार्यालयात गुरुवारी दुपारी गटविकास अधिकारी मच्छिंद्रनाथ धस दैनंदिन कामकाज करीत होते. तेव्हा कार्यालयात संशयित उद्धव रामभाऊ पवार (रा.तळणी) आले. त्यांनी श्री.धस यांना ‘माझे पैसे मला परत करा’ असे म्हटले. त्यावर गट विकास अधिकारी धस यांनी आपल्याकडे तुझे कोणतेही पैसे नाहीत, असे सांगितले. त्यामुळे संतापलेल्या उद्धव पवार यांनी श्री.धस यांना जातिवाचक शिवीगाळ केली, त्यानंतर खुर्चीवरून खाली ओढून चापटा व बुक्क्यांनी मारहाण केली. तसेच इतर तीन जणांना दालनामध्ये बोलावून घेतले. त्यांनी देखील चापटा - बुक्क्यांनी मारहाण केली.

तसेच गळ्यातील दहा ग्रॅम वजनाची सोन्याची साखळी आणि मोबाईल हिसकावून घेतला. त्यानंतर दोघांनी श्री.धस यांचे हात पकडून ठेवले, तर एकाने खुर्ची उचलून मारली, असे श्री.धस यांनी दिलेल्या फिर्यादीत नमूद केलेले आहे. याबाबत जातिवाचक शिवीगाळ करणे, शासकीय कामकाजात अडथळा आणणे आणि चोरी या कारणावरून उद्धव रामभाऊ पवार आणि इतर तीन जणांविरोधात गुन्हा दाखल झाला आहे. उपविभागीय पोलिस अधिकारी परतूर यांच्याकडे गुन्हा वर्ग करण्यात आला आहे.